Superylli shqiptar, Xherdan Shaqiri, ka reaguar me anë të një komunikate, pasi mediat e Zvicrës – kur qarkulloi fotografia e tij me imamin Shefqet Krasniqi – e akuzuan se po qëndron me njerëz të lidhur me terrorizmin.
Buja mediatike në Zvicër që u shkaktua nuk i ka pëlqyer Shaqirit, i cili ka sqaruar se sikurse imamin, ai nuk refuzon as fansa të tjerë për të bërë fotografi, teksa qartësoi se është kundër terrorizmit dhe familja e tij janë muslimanë, transmeton Telegrafi.
“Një foto e imja me imam Shefqet Krasniqin në rrjet ka shkaktuar shumë stuhi të panevojshme. Imami erdhi tek unë dhe më luti për një foto, ashtu sikurse që bëjnë mijëra njerëz të tjerë. Këtë e bëra edhe me atë, pra e bëmë fotografinë sepse nuk ishte e nevojshme ta refuzoj dhe po ashtu e pasjellshme”.
“Se ky imam ka lidhje me terrorizëm, unë nuk e kam ditur. Unë nuk mund të pyes secilin fans kush është ose çfarë bën, ashtu sikurse të vërtetoj karakterin e tyre”.
“Por, ajo që unë në mënyrë të rreptë e ndaloj është që njerëzit e shfrytëzojnë popullaritetin e tyre ashtu sikurse mediat në mënyrë të panevojshme për përfitime të veta”.
“Ne Shaqirët jemi muslimanë të vërtetë. Të gjitha rrymat radikale janë larg prej neve. I juaji Xherdani”, ka shkruar Shaqiri në gjuhën gjermane në rrjetet sociale. /Telegrafi/
