Reagon Riad Rashiti: Turp për Gjilanin

Gjilan – Seanca e jashtëzakonshme e Kuvendit Komunal të Gjilanit po kalon me shumë kundërshtime e akuza edhe në mesin e vet këshilltarëve të pozitës. Megjithatë Riad Rashiti këshilltar nga PDK-ja e ka quajtur turp këtë seancë. Në vend që të jenë qytetarë nderi, ky pushtet po i nënçmon figurat e rëndësishme siç është Joseph Biden, ku as gjysma e anëtarëve të Kuvendit Komunal nuk e votuan shpalljen e qytetar nderi të Gjilanit tha Rashiti.

Riad Rashiti tha për rajonipress se kjo formë e qeverisjes komunale, jo që nuk i bënë nder askujt, por po i turpëron gjithë qytetarët e Gjilanit. “Kjo seancë e jashtëzakonshme po e shfaqë më së miri gjendjen e jashtëzakonshme në të cilën ndodhet qyteti i Gjilanit” tha Rashiti.

Edhe, Arben Mehmeti nga LDK-ja tha se nuk po i bëjmë nder atyre që po i shpallim sot qytetar nderi. “Nuk e kuptojë personalisht qysh në rend dite futen emra dhe personalitete të rëndësishme dhe ne si Kuvend edhe proceduralisht nuk jemi të përgatitur. Kuvendi duhet të ketë dokumente e biografi për të nderuarit. Po e devalvojmë rolin e Kuvendit. Po marrim vendime jo serioze. Me këtë vendim po i degradojmë edhe ata që po shpallen qytetar nderi” tha Mehmeti.

Mehmeti tha se Kuvendi po shndërrohet vetëm në mekanizëm të votimit./rajonipress/