Reagon Qemajl Mustafa: Meritat për autostradën i takojnë PDK-së

Gjilan – Projekti i rrugës së tipit të autostradës Prishtine – Gjilan – Konçul (Dheu i Bardhë) është vendim i PDK dhe meritat për nisjen dhe futjen në agjendë të këtij projekt i takojnë degës së PDK në Gjilan, kryetarit të atëhershëm të komunës dhe sidomos atyre që e morën vendimin e që ishte Hashim Thaçi, kryeministër e Fehmi Mujota, ministër i infrastrukturës thotë Qemajl Mustafa ish kryetar i Gjilanit.

Reagimi i plotë i Qemajl Mustafës:

Ky kryetari i sotëm i Gjilanit i cili po bën svilata inauguruese e promovuese të këtij projekti, as që ka pasur haber se kur dhe çka jemi tue punue për këtë projekt. Ky kryetar qysh në vitin 2014 (kthehuni e kërkoni deklaratat e tij në google search) ka pase thënë që projekti fillon atë vit. Pastaj pa ia nda e ka përsërit që projekti nis me 2015 e me 2016 e siç po e shihni ai mund të nis në vitin 2017 në një segment të shkurt të tij, por me një kusht – nëse mjetet programohen në buxhetin e vitit 2017.

Pra, t`i biem shkurt e shqip. Mirë që më në fund po nis ky projekt anipse për mua dhe për të gjithë ata që janë ithtarë të zhvillimit të ekonomisë, është në mesin e projekteve strategjikisht të gabuara. Por, nejse. Pasi ia kemi nis të gabojmë me autostrada, le të jetë ky edhe një gabim i radhës që unë e miratoj në emër të njëfarë rivaliteti të paevitueshëm rajonal dhe në emër të dëshirës së qytetarëve (të mashtruar) të Anamoravës që ta kenë këtë rrugë.

Një qëndrim konvencional i popullit tonë thotë “asfalti s’jep me hanger!” e me këtë unë pajtohem plotësisht.

Kosovës për 20 vitet e ardhshme i është dashur vetëm zgjerim i rrugëve ekzistuese, sinjalizim i mirë i tyre që e ulë shkallën e rrezikut në trafik dhe investime të shumta në ekonomi dhe në tërheqje të investimeve. Çka i duhen asaj autostradat me rini të zhgënjyer e buzë depresioni. Me njerëz të varfër, të nënshtruar e pa perspektivë. “Luaje macë kryet e bullit” i thonë kësaj pune.

Prioritete të gabuara ka vendos kryetari edhe në komunë. Mbi 3 milionë euro sivjet në asfaltime e as 300 mijë euro në projektin MIRUSHA. Kjo është ikje totale nga agjenda e prioriteteve të qytetarëve të komunës. Fjalët për alamet miliona në trajtim të ujërave të zeza e ujit për pije do ta kenë fatin e njëjtë si fjalët e premtimet për autostradën e vitit kaherë të perënduar 2014.

Popull i Gjilanit e i Kosovës, koncentrohu, dëgjo më mirë, shih më mirë. Bëhu aktiv dhe përcaktoje fatin tënd. Nuk ka gjë më të shëmtuar se rrena dhe mashtrimi që po e bëjnë shumica e politikajve me ty.
Mos i lejo. T`i e ke këtë mundësi ka shkruar Mustafa./rajonipress/