Reagon Matoshi: Njoftimet e Qeverisë se Kamenica po bëhet me autostradë, janë mashtrim dhe fyerje për inteligjencën e këtij qyteti
Kamenicë – Njoftimi i lëshuar nga Qeveria e Republikës së Kosovës se është marrë vendimi përfundimtar për shpronësimin e disa pronave shtesë në Banullë (Komuna e Lipjanit), për rrugën me katër korsi Lipjan – Gjilan – Dheu i Bardhë, është i mirëpritur. Por, postimet në rrjete sociale që e paraqesin këtë vendim të sotëm të Qeverisë së Kosovës, si lajm se Kamenica po bëhet me autostradë janë fyerje e rëndë për inteligjencën e banorëve të Kamenicës. Është TURP me i trajtu si aq të padijshëm qytetarët e Kamenicës, aq më tepër këtë nuk duhet ta bëjë Kryetari i Komunës i cili ka marrë besimin tonë për të punuar me sinqeritet e drejtësi ka shkruar Fatmir Matoshi ish ministër.
Reagimi i plotë:
Kamenica bëhet me Autostradë, kur të përurohet:
- segmenti Lipjan – Bresalc (të shpresojmë me 28 Nëntor, sepse si datë është paralajmëruar për vitin e kaluar),
- pastaj të punohet segmenti tjetër Bresalc – Përlepnicë,
- pastaj segmenti Përlepnicë – Dheu i Bardhë
- dhe në fund kyçja e Kamenicës në këtë rrugë përmes segmentit Dheu i Bardhë – Kamenicë.
Me intensitetin e treguar në punë deri tani, ky proces i kërkon edhe më shumë se një dekadë e gjysmë deri në realizim.
Në hartën e bashkangjitur është rrethuar Banulla (Vendi për të cilin sot është vendosur për shpronësimet shtesë), vija e zezë nga Banulla në Bresalc, tregon se punët në këtë segment janë drejt përfundimit dhe pjesa me vijat e ndërprera, mbetet për t`u buxhetuar, shpronësuar, tenderuar dhe ndërtuar, pra bukur shumë punë!