Reagon LPD, policia ngritë padi

Lëvizja e Progresit Demokratik (LPD) përmes një kumtese të lëshuar sot ka reaguar ndaj aksionit të së premtes në Tërnoc të komunës së Bujanocit, ku u konfiskuan mijëra kilogramë duhan i papërpunuar.

“Ajo çfarë ndodhi dje në Tërnoc është një presion i madh ndaj qytetarëve”, kështu fillon reagimi i LPD-së i dërguar në adresë të portalit informativ Titulli.

Për LPD-në dhe kryetarin e saj Jonuz Musliun, është i papranueshëm një veprim i tillë i policisë, “t’i merret prodhimi i duhanit në shtëpi familjeve shqiptare, prej nga sigurojnë edhe bukën e gojës”.

“Këto veprime të policisë serbe ndaj qytetarëve janë të qëllimshme për të përshpejtuar migrimin e shqiptarë drejt vendeve të ndryshme të Evropës. Me këto veprime qytetarëve iu bëhet një presion i paparë deri më tash, iu ndalohet të merren edhe me bujqësi, ku pjesa më e madhe në këtë vend merren me këtë veprimtari”, thuhet mes tjerash në kumtesën e LPD-së.

Nga ana tjetër zëdhënësi i Policisë në Vranjë, Dragan Stamenkoviq ka thënë se kanë konfiskuar katër tonë duhan dhe dy makina për grirjen e duhanit.

Ai ka nënvizuar se për shkak të dyshimit se kanë kryer vepër penale, duke u marrë me tregti të paligjshme, policia kundër personave në pronën e të cilëve është gjetur duhani, do të ngre kallëzim penal.

Stamenkoviq ka thënë se këto familje duhanin e kanë prodhuar pa leje paraprake dhe se ai ishte gati për shitje.

Nga ana tjetër, gjatë mbrëmjes së të premtes, ku iu konfiskua duhani familjes së Mesud Jusufit, Qani Avdiut e Sefer Avdiut, anëtarët e këtyre familjeve tërnocase thanë se duhani ishte i papërpunuar dhe po mbahej në tavan të shtëpisë, nga ku edhe e kishte konfiskuar policia.

“Duhani nuk ishte i grirë por në fleta ashtu siç e kemi mbledhë, arsyeja pse na u morë ishte se nuk kisha kontratë me Duvanskën”, i tha Titullit njëri prej të prekurve nga ky aksion i policisë.

Zëdhënësi Stamenkoviq ka thënë se duhani është konfiskuar me urdhër të gjykatësit komunal për procedurë paraprake dhe se i njëjti gjendet në depot e British American Tobacco, në Vranjë.

Lidhur me këtë ngjarje Lëvizja e Progresit Demokratik, duke e ditur gjendjen e rëndë ekonomike që mbizotëron në këtë rajon, pret reagimin e faktorit ndërkombëtar për të ndaluar, siç thuhet, “të këtij gjenocidi ndaj shqiptarëve në Luginë të Preshevës”./Titulli.com/