Reagon Gjykata Themelore e Gjilanit

Gjilan – Sqarim lidhur me shkrimin e publikuar në portalin “Rajonipress” me datë 19 Mars 2019, me titullin “Gjykatat e lodhëta e të mykura në mendje, keqtrajtojnë qytetarët vitias me vite të tëra”.

Gjykata Themelore në Gjilan reagon ndaj këtij shkrimi, pasi që ka për qëllim denigrimin dhe ndikimin në punën e gjyqtarit.

Me këtë rast, ne ju njoftojmë kronologjikisht me rrjedhën e kësaj lënde:
Kontesti mes palëve ekziston nga data 05.02.2007, kur edhe është paraqitur padia në Gjykatën Komunale të Vitisë, me bazën juridike ‘vërtetim i drejtës së pronësisë’.
Si paditës tjerë me bazën juridike e drejta e përparësisë në blerje, për pronën e njëjtë, në procesverbalin e seancës 27.03.2008, ishte konstatuar se janë paraqitur edhe Hysen e Naser Hasimi dhe Ibrahim e Adem Halabaku, të gjithë nga fshati Pozheran i Vitisë, ndërsa padia e tyre ishte ushtruar me datë 22.02.2007. Gjykata padinë e dytë të paditësve e kishte hedhë poshtë si të parakohshme, me Aktvendimin e datës 26.06.2009, i plotfuqishëm me datë 07.08.2009.

Ndërsa padinë e parë, të paraqitur me datë 05.02.2007, e kishte vendosur gjykata me Aktgjykim me datë 06.07.2010, kurse i plotfuqishëm me datë 25.08.2010, ndërsa edhe ishte ekzekutuar, duke u regjistruar në regjistra kadastralë.

Propozimin për përsëritjen e procedurës e kishin ushtruar 4 paditësit me datë 27.07.2012, ndërsa Gjykata e Apelit e kishte miratuar propozimin e tyre.

Deri në këtë fazë gjitha veprimet i kishte ndërmarr gjyqtari i mëhershëm, ndërsa gjyqtari Raif Fazliu si gjyqtar i çështjes, me datë 29.10.2013, ka caktuar seancën përgatitore në të cilën seancë me aktvendim procedural duke u bazuar në nenin 166.2, të LPK-së, padinë e katër (4) paditësve e ka hedhur poshtë si të palejueshme, për shkak të çështjes së gjykuar. Janë mbajtur edhe dy seanca pa i ftuar 4 paditësitë, ndërsa është vendosur me Aktgjykim me datë 08.01.2014, duke ia hedhur poshtë padinë e paditësve, njëjtë sikur me aktvendimin procedural. Aktgjykimi i’u është dërguar palëve, duke përfshirë edhe 4 paditësitë, të cilët janë ankuar, ndërsa Gjykata e Apelit ka vendosur ta kthej lëndën në rigjykim dhe lënda është pranuar me datë 07.03.2019 dhe e njëjta konform dispozitave ligjore në fuqi do të procedohet më tutje.

Andaj, bazuar në rrjedhën e procedurës në lidhje me këtë çështje, Gjykata Themelore në Gjilan, konsideron se shkrime të tilla me tendenca ndikimi në punën e gjyqtarit, dëmtojnë sistemin e drejtësisë në Republikën e Kosovës thuhet në reagimin e Gjykatës Themelore në Gjilan./rajonipress/