RC Cola Drita pas shtatë vitesh kërkon rikthimin në Superligë

Basketbollistët e RC Cola Drita nesër duke filluar në orën 17:00 në Palestrën “Bashkim Selishta-Petriti”, do të zhvillojnë ndeshjen e parë finale të Play Off me Istogun, për të kërkuar rikthimin pas një kohe të gjatë në Superligën e basketbollit Kosovar.

Në kampionatin e Ligës së Parë, RC Cola Drita është pozicionuar në pozitën e parë e cila ishte e pa konkurrencë në këtë rang të garave, ndërsa skuadra e Istogut është pozicionuar në pozitë të dytë.

RC Cola Drita në dy ballafaqimet e ka mposhtur rivalin e nesërm Istogun, si mysafirë e ka mposhtur 85:86, ndërsa në Gjilan e ka mposhtur me rezultat 87:85.

RC Cola Drita kishte humbur statusin e Superligës në edicionin e vitit 2013/2014, ndërsa gjatë kësaj periudhe kishte kriza të mëdha si në rezultat poashtu edhe me mjete financiare.

RC Cola Drita në gjysmëfinale ka mposhtur në dy ndeshje skuadrën nga Prishtina, Marigona Hill, ndërsa Istogu në gjysmëfinale ka mposhtur me rezultat 2:1 AS Prishtinën.

Finalja zhvillohet me 3 ndeshja, fituesi i kësaj finale do të inkuadrohet direkt në Superligë, ndërsa skuadra humbëse ka edhe një rast, pasi të zhvillon ndeshjen e Play Out me skuadrën e Trepçës së Mitrovicës./rajonipress/