Rasti i Dobrosinit mbahet “top sekret”

Gjilan – Kryeprokurori Jetish Maloku tha për rajonipress se ndihen të zhveshur dhe të izoluar nga rasti i Dobrosinit. Edhe pse arrestimet kanë ndodhur në Gjilan ne nuk kemi asnjë informacion meqë bëhet fjalë për një vepër penale me rrezikshmëri të madhe. As policia nuk ka informacione.

Arrestimet e kryera nga EULEX-it për të shtënat në punktin e Dobrosinit para pak ditësh vazhdojnë të mbesin të “fshehura” dhe larg publikut nga EULEX-i, duke mos treguar asnjë informacion rreth këtij operacioni.

Edhe pse arrestimet janë kryer në territorin e Gjilanit as kryeprokurori i Qarkut, as Gjykata e as policia nuk kanë asnjë informacion zyrtarë se kush janë të arrestuarit, për çka bëhet fjalë dhe cili është efekti i këtij operacioni.

Kryeprokurori Jetish Maloku ndihet i anashkaluar në këtë rast. “Ne jemi të zhveshur dhe të izoluar nga çfarëdo informacioni që lidhet me rastin e Dobrosinit. Edhe pse ngjarja është zhvilluar në territorin tonë unë asnjë lajm nuk e kam për këtë aksion. Krejt çka mund të them e di se bëhet fjalë për një vepër penale me shkallë të lartë të rrezikshmërisë që lidhet me terrorizëm” tha për rajonipress Maloku.

Maloku tha se me rastin e Dobrosinit ka udhëhequr njësia antiterrorizëm nga Prishtina dhe krejt lënda është atje në EULEX.

Edhe zëdhënësi i policisë Ismet Hashani vetëm konfirmoj se rasti i Dobrosinit është udhëhequr nga Prishtina dhe se policia e Gjilanit nuk ka asnjë informacion rreth këtij operacioni.

Ndryshe policia e EULEX-it arrestimin e fundit që lidhet me të shtënat në Dobrosin e ka bërë më 16 tetor ku qenë prangosur tre persona të dyshuar se janë pjesëtarë të një organizate terroriste, e cila e ka marrë përgjegjësinë për tri sulme mbi Policinë e Serbisë në Dobrosin, afër Pikë-kalimit 5 – Dheu i Bardhë.

Sipas të vetmes komunikatë të EULEX-it dy persona dyshohet se kanë marrë pjesë në sulmin e fundit që ka ndodhur më 7 tetor 2012. /rajonipress/