Rastet e reja me koronavirus, IKSHPK-ja rekomandon SHSKUK-në të përgjysmojë të gjitha shërbimet

Gjatë 24 orëve të fundit, në Kosovë janë regjistruar edhe 96 raste të reja me koronavirus.

Instituti Kombëtar i Shëndetësisë Publike të Kosovës (IKSHPK), ka bërë të ditur se nga 439 mostra të marra, 96 persona kanë rezultuar pozitivë me koronavirus, kështu duke e çuar në 2 mijë e 169 numrin e përgjithshëm të të infektuarve në vend, shkruan lajmi.net.

Duke e parë që gjatë ditëve të fundit e pikërisht prej lirimit të masave mbrojtëse kundër koronavirusit janë rritur rastet me të infektuar me sëmundjen COVID-19, IKSHPK-ja e ka rekomanduar Shërbimin Spitalor, Klinik dhe Universitar të Kosovës (SHSKUK), që të përgjysmojë të gjitha shërbimet.

Po ashtu, përmes njoftimit, IKSHPK-ja ka kërkuar nga të gjitha bizneset që të respektojnë të gjitha rekomandimet e dhëna si dhe ua ka bërë me dije qytetarëve që bartja e maskave është obliguese.

“Apelojmë te qytetarët, bizneset, gastronomia, që në mënyrë strikte të respektojnë distancën fizike, përdorimin e maskave, dezinfektimin dhe ajrosjen e lokaleve, duke pamundësuar përhapjen eventuale të infeksionit dhe shmangien e përhapjes në hapësirat e mbyllura. Duke marrë parasysh nevojat e qytetarëve për shërbime shëndetësore, bëjmë apel te punëtorët shëndetësor t’iu përmbahen rekomandimeve të IKSHPK në aplikimin e masave mbrojtëse duke ruajtur kështu shëndetin e tyre, të pacientëve dhe të gjithë qytetarëve të vendit. Rekomandojmë SHSKUK të përgjysmojë të gjitha shërbimet dhe të ndalojë rreptësisht hyrjen e përcjellësve në reparte, shërbime specialistike dhe klinika. Përpjekja e madhe e përbashkët e derisotme mund të na shkojë huq për shkak të pakujdesisë së mos përmbajtjes së tri rregullave themelore, të cilat duhet të jenë përditshmëri e jona edhe pa pandemi, e që nënkupton: mbajtjen e distancës fizike, mbajtjen e maskave dhe larjen e duarve me kujdes disa herë në ditë, për 20-30 sekonda”, thuhet ndër të tjerash në njoftimin e IKSHPK-së, raporton lajmi.net.

Theksojmë se në bazë të të dhënave zyrtare të IKSHPK-së, deri më tani në vend janë 2 mijë e 169 të prekur me koronavirus, ku 36 prej tyre fatkeqësisht kanë ndërruar jetë, kurse 1 mijë e 47 kanë arritur që të shërohen. /Lajmi.net/