Rasmussen: Nuk jemi okupatorë të Kosovës

Sekretari i Përgjithshëm i NATO-s Anders Fogh Rasmussen, tha sot se shpreson se Marrëveshja e Brukselit do të implementohet dhe se kjo do të shpie në përmirësimin e situatës në terren.

“NATO-ja është e angazhuar për të mbështetur zbatimin e Marrëveshjes dhe ne do të bëjmë gjithçka që mundemi për të ndihmuar”, tha Rasmussen në një konferencë shtypi në Bruksel.

Ai i përgëzoi udhëheqësit nga Prishtina dhe Beogradi në vendosmërinë për të gjetur zgjidhje politike.

“Jam i kënaqur që të dyja palët kanë besim në NATO dhe në KFOR dhe se na shohin si garant i paanshëm të zbatimit të Marrëveshjes”, shtoi shefi i NATO-s, i cili hodhi poshtë akuzat se Pakti veriatlantik ka okupuar Kosovën.

“Kini kujdes, misioni i KFOR-it vepron në bazë të mandatit që ka marrë nga Kombet e Bashkuara, me pëlqimin e palëve në konflikt”, theksoi Rasmussen, pasi një deputet grek në Parlamentin Evropian e pyeti “për sa kohë NATO do të okupojë Kosovën”‘.

Rassmusen përkujtoi se Parlamenti Evropian në disa rezoluta ka mbështetur misionin e KFOR-it si garantues të sigurisë në Kosovë.

“Pra, vështirë se mund të quhet okupim”, shtoi ai.

Shefi i NATO-s kritikoi ashpër mbështetjen në doktrinën e “fuqisë së butë”, të cilën e kërkojnë ata që mendojnë se kombinimi i përpjekjeve diplomatike dhe presioneve ekonomike japin rezultate më të mira se kërcënimi me forcë ushtarake.

“Të jemi të qartë, ‘fuqia e butë’ pa kërcënim me dhunë nuk është kurrfarë fuqie”, shtoi Rasmussen, për të cilin kombinimi i dy elementeve është receta më e mirë. /Telegrafi/