Rashiti: Ishin paraparë sanksione lidhur me iniciativën për zhbërjen e Speciales
RajoniPress
19:23, 5 Shkurt, 2018
Naim Rashiti nga Grupi për Hulumtim të Politikave Ballkanike duke komentuar zhvillimin e fundit që kryeministri i vendit, Ramush Haradinaj ka marrë vizën amerikane, ka thënë se ky është një lajm i mirë.
“Është lajm i mirë por nuk mjafton vetëm shkuarja në Lutjet e Mëngjesit. Urojmë të ketë vizita zyrtare në State Department së shpejti”.
Sipas Rashitit, zgjatja e procesit që kryeministri të pajiset me vizën për në SHBA ka qenë një sanksion, që ndërlidhet me iniciativën për shfuqizimin e Ligjit për Gjykatën Speciale.
“Vizat dhe sanksionet tjera kanë qenë procesi i suspendimit të cilat kanë sjellë situata të palakmueshme për liderët. Është thënë troç, vizat janë suspenduar dhe janë paraparë sanksione të tjera për iniciativën për Dhomat e Specializuara dhe tani kemi kthim atje ku është dashur të jemi”, tha Rashiti, në Info Magazine të Klan Kosovës.
“Ka qenë e konfirmuar dhe publike, ka qenë vendim i State Departamentit dhe shtetet e Kuintit (QUINT). Janë paraparë një numër sanksionesh për liderët edhe deputetët”, tha ai.
Megjithatë, sipas tij, tashmë ka ndryshime në marrëdhëniet e liderëve kosovarë me vendet ndërkombëtare mike.
“Dëmi është bërë në marrëdhëniet e liderëve me Perëndimin, është krijuar mosbesimi i madh. Çështja e Dhomave të Specializuara është proces afatgjatë, së paku deri në vitin 2020 dhe ne duhet të kemi kujdes me diskursin dhe menaxhimin e këtij procesi, mos të krijojmë situata të palakmueshme”.
“Më mirë se sa me Ligjin për Dhomat e Specializuara, institucionet të merren me menaxhimin e procesit. Situata të palakmueshme nëse nuk menaxhohen, mund të kemi deri atëherë”.
Rashiti duke folur për dy temat më aktuale në vend, iniciativën për shfuqizimin e Ligjit për Gjykatën Speciale dhe Demarkacionin me Malin e Zi ka thënë se mes këtyre dy çështjeve ka dallim thelbësor.
“Për Ligjin për Dhomat e Specializuara, për faktin se është bërë marrëveshje ndërkombëtare, shtetet mike nuk presin dhe nuk duan shkëputje dhe anashkalim të zotimeve ndërkombëtare”.
“Marrëveshja e Demarkacionit është tjetër, ka pas mosmarrëveshje nga fillimi dhe është çështje kryesisht e brendshme, të cilën nuk e besoj se ndërkombëtarët do të insistojnë”, tha Rashiti.
