Rashiti: Haziri i LDK-së totalisht i painformuar për komunën e tij

Gjilan – Është totalisht joserioze që një kandidatë për kryetar të komunës të premtojë në fushatën e tij parazgjedhore diçka që tanimë ka ndodhur nga komuna e Gjilanit thotë në reagimin e tij Riad Rashiti drejtor i Zhvillimit Ekonomik Gjilan.

Në reagimin e tij kundër deklaratave të Lutfi Hazirit rreth taksave në tregun e gjelbër Riad Rashiti thotë se këtë të shtune (ditën e pazarit) kandidati i LDK-së vizitoi tregtarët në tregun e gjelbër të Gjilanit, ku i siguroi dhe i premtoi se do t`i ulë dhe do të ketë më pak taksa për tregtarët, ndërsa komuna e Gjilanit nga janari i këtij viti i ka hequr të gjitha taksat komunale për ta, pra nuk kanë fare taksa komunale ata, e kjo është Nocoment.

Gjithashtu ai nuk kishte aspak njohuri se sa biznese të regjistruara e ushtrojnë veprimtarinë e tyre në tregun e gjelbër të qytetit, ndërsa fliste për mijëra.

Ndërkohë u kishte premtuar se me mjete vetanake do të investojë dhe ndërtojë tregun e gjelbër, e që kjo është e pamundur të bëhet, sepse nuk ka as teori që komuna t`i ndajë mbi 1 milion euro për këtë projekt, kushdo që do të qeverisë me komunën dhe buxhetin e saj në mandatin e ardhshëm.

Rashiti thotë se kandidati i LDK-së për Gjilanin nuk është ende i përgatitur për garën të cilën e ka nisur, i duhet shumë punë dhe mundi për të bërë, në mënyrë që t`i bind qytetarët për ta zgjedhur për pozitën e kryetarit të komunës të cilën e kishte braktisur në vitin 2006, për interesa të tija e jo për interesa të Kosovës apo të Gjilanit, sepse angazhimi dhe puna e tij që e ka bërë pastaj e ka dëshmuar këtë.

“Haziri kishte pozita shumë të rëndësishme në Qeveritë e Republikës së Kosovës, nga zv.Kryeministri, Ministri e Deputeti, por nuk dallohet për ndonjë të arritur për komunën e tij të cilën synon ta udhëheqë nëse e fiton garën zgjedhore. Gjilani nuk di ndonjë dobi nëse Haziri i ka sjellur komunës, ku përveç decentralizimit ai edhe e ka dëmtuar komunën e Gjilanit për dy vite sa qeveriste LDD-ja me komunën” ka thënë Rashiti.

Në rrugëtimin e tij politik nga Gjilan-Prishtinë-Vjenë, ai ka dhënë rezultate të njohura për secilin qytetarë të Gjilanit, me disa plusa, por dhe me plot minusa, një minus të gjatë deri të Komuna e Novobërdës, por e cila nuk është shumë larg sepse tani komuna e Novobërdës gjendet deri në brendësi të lagjes së Dardanisë.

Sot, Haziri nga pamundësia e tij që të qëndrojë aktiv në Prishtinë, nuk i ka mbetur tjetër pos që të shpresojë e të bëhet kryetar i komunës së Gjilanit. “Por si duket ka kaluar kohë e gjatë që është transferuar në Prishtinë dhe ende nuk është ambientuar me Gjilanin, ende nuk e ka të qartë se ku e ka lënë ai komunën kur ka ikur dhe ku është sot komuna e tij, ende nuk është informuar mirë me disa të arritura të komunës së tij, por kjo arsyetohet dhe duhet të kuptohet se edhe një qytetar i Gjilanit mund të mos jetë i informuar mirë për ndonjë komunë tjetër” ka shtuar Rashiti./rajonipress/