Rashica: Dua të luaj në Euro 2016

Milot Rashica, ylli i Vitesses, shpreson të marrë një ftesë nga Gianni De Biasi për Euro 2016.

Mesfushori vushtrrias, Milot Rashica është ftuar nga Gianni De Biasi për dy ndeshjet miqësore ndaj Austrisë dhe Luksemburgut pas paraqitjeve të mira me Vitessen në Holandë. Por, para se t’i bashkohet Kombëtares A, ish lojtari i Vushtrrisë do të luaj me ekipin U21 të Shqipërisë në ndeshjen ndaj Greqisë.

“Jam shumë i lumtur për ftesën. Shpresoj që të shkoj atje, të kaloj sa më mirë dhe të jap të gjithë maksimumin tim për të gjitha këto ndeshje me Kombëtaren. Për momentin jam i përqendruar me ekipin Shpresa. Jo vetëm për mua por, për të gjithë ne është një ndeshje shumë e rëndësishme. Synimi është të bëjmë një ndeshje të mirë dhe pse jo të fitojmë. E më pas kur të shkoj në Kombëtaren e madhe shpresoj që gjithçka të shkojë mirë edhe aty”, ka deklaruar ai

Ëndrra e madhe e Rashicës është pjesëmarrja me Shqipërinë në Kampionatin Europian. Djaloshi nga Vushtrria e ka të qartë se duhet të vazhdojë sezonin fantastik, për të shpresuar te ftesa nga De Biasi.

“E kam thënë edhe më parë, që ajo është një ëndërr e imja, por trajneri është ai që vendos. Unë do të vazhdoj të jap maksimumin, si me Shpresat, ashtu edhe me Vitessen. Shpresoj ta mbyll një sezon shumë të mirë. Për atë nuk i dihet, është trajneri ai që vendos”, ka theksuar ai.