Rapsodi historike : Veli Dedi – hero i popullit

Teksti dhe muzika: Demir Krasniqi/ Nga Medvegja e përtej deti – Nuk harrohet Veli Dedi! Le n’ Dediq – në Jabllanicë,
N’ djep të trimave t’ shqiptarisë!

Më 5 Prill 1912,
U lind trimi i vërtetë !
Në Dediq, afër Medvegjës,
Që shkëlqeu si drita e rrezes !

Në Medvegjë e në Gazdar –
Kreu shkollimin fillestar !
Në gjimnazin e Leskocit –
Ndër shkollar s’i gjendej shoqi !

Prindërit mburreshin me këtë evlat –
Mori rrugë për Beograd !…
Mori rrugë drejt diturisë –
N’ Fakultet t’ Makinerisë !

Shkoi në Shkup, Veliu i ri –
Me qëllim që t’ shkojë n’ Turqi !

Më 1932 –
Në një firmë n’ punë kishte hy !
Por, një shkrim i Bedri Pejanit –
Ndërroi mendimin e Veli djalit !
Hoqi mendjen prej Turqisë –
Mori rrugën drejt Shqipërisë !
Në Shqipëri kishte merak –
Që të bëhej ushtarak !
Por, për t’iu rrekur kësaj lame –
Duhej ditur gjuhën italiane !
Por, Veliu nuk u dorëzua –
Shumë shpejt gjuhën e kishte mësua !

N’ Akademi ishte regjistrua –
Ëndrrën e jetës me e realizua !
Gjatë qëndrimit në Shqipëri,
Dhe studimeve në Itali,
U njoftua në rrugë të mbarë –
Me shumë patriotë shqiptarë !…
Ndër ta ishte Bedri Pejani –
Me te mburrej gjithë vatani !
Njohu Rexhep Mitrovicën –
Vëlla e gjak me Azem Galicën !
U njoh me Emrush Miftarin –
Burrë i nderit, bir shqiptarin !
Njohu Ibrahim Gjakovën –
Që nderonin mbarë Kosovën !
Njohu Sali Vuçitërrnën –
Që urrenin tmerrin, therën !
U njoftua me Xhemajl Kadën –
N’ histori shkruan dekadën !
U njoftua me Asim Vokshin –
Nderuan Shkodrën, Taraboshin !…
U njoh me shumë trima tjerë –
Që Atdheut i bënë nderë !

Më 1933 –
Hyn Veliu, n’rrugë të re !…
Anëtarësohet n’ Komitet t’ Mbrojtjes
Kombëtare të Kosovës !
Në Spanjë plasë luftë qytetare –
Veliu, shkoi n’ bazë vullnetare !
Luftë pas lufte nëpër teren –
Më 1937 gradohet kapiten !

Më 1938 –
Dekorohet me gradë t’ vërtetë !
Me Urdhrin e Kavalierit të Lirisë –
Nderohet biri i shqiptarisë !
Veli Dedit i shtohet ndera –
E merr titullin :”No Pasera” !
Gradë pas grade u vendos –
Shef Operativ i Divizionit t’ Ebros !
Pas mbarimit të luftës n’ Spanjë –
Veli Dedi vendoset n’ Francë !
Në një kamp të përqendrimit –
Shpejt mësoi gjuhën e komunikimit !
Si ushtarak i rryer n’ degë specialiste –
Shpejt inkuadrohet n’ grupet antifashiste !
Për shkathtësi, aftësi, vizione verifikohet –
Komandant njësiti shumë shpejt emërtohet !
Komandant i Forcave Çlirimtare –
Për Departamentin e Marsejës !
Për zotësi dhe për guxim –
E shpallin:”Shqiptari trim” !
Ai me njësi t’ vogla të betejës –
Operonte n’ rrugët e Marsejës !
I thyente njësitet specialiste –
Forca shumë më t’ mëdha fashiste !
Nën drejtim të tij, në sajë t’ aftësisë –
Dorëzohen 37 mijë fashistë !
Të cilët shumë ashpër po luftonin –
Tërë Marsejën donin ta rrënonin !

Veli Dedi e dinte metodën –
Shpejt i bindi që të dorëzohen !
N’ bazë t’ konventave ndërkombëtare
Dhe në mënyrë profesionale !
Madje në hollësi ishin siguruar –
Njësitet franceze që ua kishin garantuar !
Veli Dedi bukur e dinte anglishten ,
Po ashtu e fliste edhe gjermanishten …
Biseda për trima, gjithmonë seç e joshte –
Për Hasan Prishtinën, me krenari thoshte:
“N’ jetën time, tri herë kam qëndruar gatitu –
Para shpirtit, zemrës, mendjes së tij të ndritur …
Herën e parë, barrë e akullt m’ kaploi shpinës –
Kur dëgjova lajmin për vrasjen e Hasan Prishtinës !
Herën e dytë, n’ letra kur i kam lexuar –
Kujtimet e tij, që i ka lanë të shkruar !…
Kishte shkruar për luftëra dhe ngjarje gjithë fare ,
Kishte shkruar bindshëm për Kryengritjen Shqiptare –
Që ka ndodhë n’Kosovë më 1912,

N’ faqe të pashlyera – kujtim na i la për jetë !
Herën e tretë, n’ vitin 1977 –
Mall e zjarr mu ngrinë anembanë në shtat !
Qëndrova gatitu si të isha ngri –
Kur eshtrat e Hasanit u sollën n’ Shqipëri”!
Sa të kthjellët e kishte mendjen –
Na e ka lënë të shkruar thënien:
“Kam frikë se po vdiqa , Kosovën pa e çliruar –
S’ do t’ më le t’ qetë dheu, n’ amshim për të pushuar “!

Gjeneralmajor Veli Dedi,
Ndërroi jetë në Tiranë …
Por, veprat nuk tretin –
Kujtim që na i ka lanë !

Ai, vdiq më 3 Shkurt,
T’ vitit 1995 –
N’ zemrat tona kurrë
Nuk do t’ ketë harresë !
Varrimi i gjeneralmajor Veli Dedit –
Iu bë me zakone dhe sipas adetit !
Me nderime t’ larta nga kreu i Atdheut –
U përcoll n’ amshim , burri i këtij dheut !
Nderime të larta iu banë prej Tiranës –
Luftëtarit trim – veteran i Spanjës !

Dhe si komandant n’ operacionet e çlirimit ,
T’ Departamentit t’ Marsejit, n’ frontet e luftimit !…
Si ushtarak besnik i kombit shqiptar –
N’ Rreth të Bajram Currit, gjithmonë prijatar !
Si deputet shumëvjeçar me punë dhe fitore –
Varrim me nderime të larta shtetërore !
Për meritat e mbarë truallit dhe rruzullit –
Në Shqipëri është shpallë Hero i Popullit !
Për ty, faqe t’ arta do t’ shkruaj historia –
S’ të harron Kosova, të nderon Shqipëria !/rajonipress/

Gjilan, më 25.02.2016. Demir Krasniqi