Ramush Haradinaj: Tribunali themelohet brenda muajit

Lideri i AAK-së, Ramush Haradinaj ka deklaruar se kjo legjislaturë e ka për obligim që ta themeloi Dhomën e Veçantë për krime lufte gjatë muajit prill. Haradinaj ka sqaruar se ka parapëlqyer që fillimisht të mbahen zgjedhjet, mirëpo për këtë ai e fajëson kryeministrin e vendit Hashim Thaçin.

“Unë kam dashtë me i mbajt zgjedhjet në shkurt apo mars të këtij viti dhe legjislatura e re me i marrë obligimet edhe ndaj EULEX-it edhe gjyqësorit dhe temat tjera. Nuk ka fituar ideja ime, ka fituar ideja e kryeministrit që mos të mbahen zgjedhjet tash. Ndërsa tani po duhet me i krye këto punë e mandej mund të shkohet në zgjedhje. Jam i bindur që do të kërkohet që të përmbyllen deri në fund të muajit prill”, ka deklaruar Haradinaj në një ligjëratë në Kolegjin “Pjetër Budi”.

Ai më tej ka kritikuar edhe veprimet e kryeministrit Thaçi për rritje pagash e pensionesh. Këto veprime Haradinaj i konsideron si fushatë të Thaçit që do t’i sjellin deri në 5% më shumë vota.

“Thaçi është i detyruar të veproj me ato instrumente, me ato karta që ekzistojnë gjatë qeverisjes, si: rritja e pagave, rritja e pensioneve për Trepçën, për KEK-un, Ligji për veteranët e veprime tjera. Pra mund të ndodhë që deri në zgjedhje ai mund të përdor edhe karta tjera, e këto bëjnë numra apo vota. Këto që i përmendëm, bëjnë 3, 4 apo edhe 5 % të votave. Mirëpo këto nganjëherë nuk ndihmojnë, këto veprime nuk e bëjnë të mjaftueshëm ndryshimin në substancë”, ka theksuar Haradinaj.