Ramiz Lladrovci rreshtohet fuqishëm pas Enver Hoxhajt: Kosova ka nevojë për përvojën, vizionin dhe kapacitetin e tij shtetformues

Kryetari i Drenasit, Ramiz Lladrovci, ka shprehur publikisht mbështetjen e tij për kandidatin e Partia Demokratike e Kosovës, Enver Hoxhaj, duke e cilësuar atë si një nga figurat më të kompletuara politike dhe diplomatike që ka nxjerrë Kosova në vitet e pasluftës.

Përmes një mesazhi publik, Lladrovci ka bërë thirrje që qytetarët t’i japin mbështetje Hoxhajt në zgjedhjet e 7 qershorit, duke vlerësuar lart kontributin e tij në ndërtimin e institucioneve shtetërore dhe përfaqësimin e Kosovës në arenën ndërkombëtare.

“Mikun tim Enverin, sikur deri më tash, ia ofroj përkrahjen e plotë për zgjedhjet e 7 qershorit. Ftoj po ashtu qytetarët ta votojnë dhjetëshin e PDK-së. Puna dhe angazhimi i tij si profesor, diplomat, deputet, ministër, zëvendëskryeministër, ushtrues detyre i kryetarit të PDK-së dhe në poste të tjera me rëndësi për shtetin dhe shtetësinë, janë kryer me nder, përgjegjësi dhe kompetencë”, ka deklaruar Lladrovci.

Ai ka theksuar se përvoja e gjatë e Hoxhajt në diplomaci dhe njohja e thellë e proceseve ndërkombëtare përbëjnë një aset të rëndësishëm për Kosovën në një periudhë kur vendi përballet me sfida të shumta politike, ekonomike dhe diplomatike.

Sipas Lladrovcit, aftësia e Hoxhajt për të ndërtuar ura komunikimi, për të ofruar zgjidhje konkrete dhe për të mbrojtur interesat shtetërore e bën atë një nga figurat më të përgatitura për të përfaqësuar qytetarët në Kuvendin e Kosovës.

“Njohja e thellë e diplomacisë, problematikave ndërkombëtare dhe kreativiteti për të ofruar zgjidhje më të mira e më të favorshme për Republikën e Kosovës dhe qytetarët e saj, më bën krenar të jem në mbështetje të kandidaturës së Enver Hoxhajt”, ka shtuar ai.

Mbështetja e Lladrovcit vjen në një kohë kur Hoxhaj po zhvillon një nga fushatat më intensive në vend, me takime të shumta në qytete dhe komuna të ndryshme të Kosovës. Përkrahësit e tij vlerësojnë se përvoja akademike, angazhimi diplomatik dhe roli i tij në proceset e rëndësishme shtetformuese e kanë shndërruar Enver Hoxhajn në një prej figurave më të njohura dhe më të respektuara të skenës politike kosovare.

Me zgjedhjet e 7 qershorit në prag, mesazhi i Ramiz Lladrovcit përbën një mbështetje të qartë politike për kandidatin e PDK-së, duke e paraqitur Hoxhajn si një profil me përvojë, kredibilitet dhe vizion për t’u përballur me sfidat e ardhshme të Kosovës./rajonipress/