Ramadani po e dezinformon opinionin

Gjilan – Nazmi Rapuca duke ju kundërpërgjigjur Ramiz Ramadanit thotë se drutë e konfiskuara nuk janë shitur nga 18 , por nga 31 € m3. Informojmë opinionin se shkrimi në fjalë nuk ka të bëjë fare me të vërtetën, por se është vetëm edhe një tendencë e Ramiz Ramadanit të LDK-së, për të dezinformuar opinionin për qëllime që tashmë dihen.

Ç’është edhe më keq, ky, kolegu im, Ramiz Ramadani, është mirë i informuar se sa janë shitur drutë e konfiskuara, pasi dje është parë të ketë kontaktuar me Operatorin ekonomik “Pylla” dhe sigurisht se është informuar hollësisht për këtë çështje.

E vërteta është se drutë e konfiskuara janë shitur me tender me çmim 31 €/ m3. Kjo punë është transparente dhe mund të konstatohet nga kush të dojë me anë të kontratës së nënshkruar nga Drejtoria dhe nga NTP “Pylla” sqaron Rapuca.

Sipas Rapucës e vërteta tjetër është se drutë e konfiskuara, sipas ligjit dhe udhëzimit administrativ, pa tjetër duhet të shiten përmes procedurave të tenderimit dhe se nuk mund të falen apo dhurohen.

Në vitin 2010, ne, drutë e konfiskuara ua dhuruam institucioneve komunale-shkollave, teatrit etj. Mirëpo patëm vërejtje nga auditori dhe nga Agjensioni Pyjor i Kosovës. Nga ky vit të gjitha drutë e konfiskuara i kemi shitur me procedura të rregullta tenderuese, në harmoni me ligjin, kurse çmimi i shitjes varet nga konkurrenca e tregut e jo nga dëshirat tona ka sqaruar Rapuca./rajonipress/