Rahimaj: Viti 2023 ishte vit i Kamenicës

Kamenicë – Fundi i vitit 2023 e gjeti Komunën e Kamenicës me projekte të cilat prekin investime milionëshe. Projekte në infrastrukturë, shëndetësi, arsim, ekonomi, bujqësi, kulturë, rini dhe sport, u prezantuan në diskutimin publik për vitin 2023 të mbajtur nga Kadri Rahimaj.

Të pranishëm në këtë diskutim ishin Drejtorë të Drejtorive Komunale, mysafirë si Kryetari i Komunës së Gjilanit, Alban Hyseni, deputetja Arta Bajralia, si dhe qytetarë e përfaqësues të OJQ-ve dhe medieve.

I pari i komunës duke falënderuar të pranishmit për prezencën e tyre, hapi këtë diskutim duke e nisur me llogaridhëniet për premtimet e dhëna.
“Çka kemi bo për 2 vite? E kemi quajtur këtë diskutim kështu për të prezantuar të gjitha punët tona të cilat i kemi realizuar përgjatë dy viteve që kur morëm mandatin. Premtimet e dhëna për rregullimin e mirëqenies së qytetarëve tanë kanë arritur duke realizuar projekte në shëndetësi, infrastrukturë, kulturë, rini dhe sport, arsim, ekonomi, bujqësi. Me këto investime e kemi dëshmuar që çdo projekt i realizuar ka vetëm një qëllim, qytetarin dhe vetëm qytetarin, ku mbi këtë parim kemi marr mandatin”, ka thënë Rahimaj.

Rahimaj e vazhdoi diskutimin e tij duke prezantuar në detaje investimet e bëra në fushat e cekura.
“Në Shëndetësi kemi arritur të sigurojmë mamografin dhe rentgenin, janë dhënë ndihma momentale, është bërë renovimi i AMF-ve në Topanicë dhe Busavatë.
Në Infrastrukturë kemi ndërtuar trotuare, asfaltim të 20 rrugëve lokale, ridizajnim të qendrës së qytetit, rrugë në bashkëpunim me Ministrinë, ndërtim dhe kyçje në rrjetin e ujësjellësit, parking i gjelbër, dy puse të reja për shtimin e kapaciteteve për ujë të pijes, kanalizim i ujërave të zeza, rregullim të shtratit të lumit në Hogosht.

Në Kulturë, Rini dhe Sport kemi nënshkruar projektin për ndërtimin e stadiumit të atletikës, stadium sintetik i ‘KF. KIKA’, stadium kryesor i Hogoshtit, renovimi i tri aseteve të Trashëgimisë Kulturore, subvencionimi i klubeve sportive dhe OJQ-ve.

Në Arsim kemi nënshkruar projektin për ndërtimin e shkollës “Fan Noli”, rinovimi i dy shkollave të mesme, çerdhe e re, palestra e sporteve, rinovim i shkollës “Skëndërbeu”, rinovim i çerdhes ‘Filizat’, smart TV në secilën klasë, invetime në kabinete, bursat me vlerën më të madhe ndonjëherë.

Në Ekonomi kemi nënshkruar marrëveshjen për projektin më të madh turistik “Lugu i Verdhë”, Zip line, parku teknologjik, parku i aventurave, grante për bizneset, praktikë me pagesë për të rinjtë, shenjëzim i shtigjeve malore.

Në bujqësi është bërë inventarizimi i tokave, penda për sistemin e ujitjes, subvencionim i farës së grurit, subvencionim i qumshtit, mekanizëm bujqësor bazuar në kërkesë”, është shprehur Rahimaj.
Ndër të tjera Rahimaj në këtë diskutim ka thënë se si qeverisje për të lehtësuar edhe më shumë jetën e qytetarëve kanë bërë edhe punë të tjera siç janë:

• Barna falas për pensionistët;
• Rekrutimi i pediatrit, gjinekologut, radiologut, urologut;
• Sigurimi i donacionit të ultrazërit 4D;
• Organizimi i festivalit Kamenica Summer Fest;
• Funksionalizimi i KVRL-së;
• Funksionalizimi i teatrit dhe shfaqjeve filmike;
• Vendi i tretë në Kosovë për transparencë komunale;
• Funksionalizimi i Këshillave Lokale;
• Linjë e gjelbër për diasporë;
• Digjitalizimi i sistemit arsimor;
• Ushqim i shëndetshëm në çerdhe;
• Vizita sistematike të nxënësve;
• Themelimi i Qendrës së Karrierës;
• Lodra të reja në çerdhe;
• Rritje e buxhtit në të gjitha fushat;
• Rinovimi i ndërtesave shumë-banesore;
• Letra e bardhë për investime;
• Rregullore e re për taksa;
• Themelimi i ndërmarrjes publike ‘Dardana’.

Pas prezantimit të punëve të bëra, i pari i komunës hapi debatin për pyetje dhe diskutim nga të pranishmit.

Ndërsa ky diskutim u përmbyll me premtimin se vitet në vazhdim e presin Kamenicën me investime edhe më të mëdha.