Ragmi Mustafa rizgjidhet kryetar i PDSH-së

Preshevë- Sot në shtëpinë e kulturës “Abdullah Krashnica” në Preshevë në mënyrë madhështore po mbahet Kuvendi i V -Zgjedhor i Partisë Demokratike Shqiptare të Luginës së Preshevës. Në manifestimin solemn të mbajtjes së Kuvendit të pestë zgjedhor, pos anëtarëve e delegatëve të PDSH-së morën pjesë edhe përfaqësues të partive politike shqiptare si nga Shqipëria, Maqedonia, Kosova e Lugina e Preshevës, njofton “Presheva Jonë”

Në Preshevë u mbajt Kuvendi i V-të zgjedhor i PDSH-së

Kuvendin e sotëm e përshëndetën kryetari i Forumit Rinor të PD nga Tirana, Gerti Bogdani me ç’rast solli mesazhet më të ngrohta PDSH nga kryeministri shqiptar dhe kryetari i PD-së, Sali Berisha i cili tha se rezultatet e shqiptarëve në përgjithësi po shkojnë drejt Evropës së bashkuar.

Ndërkaq,në emër të BDI-së së Maqedonisë Kuvendin e përshëndeti Teuta Arifi, nënkryetare e kësaj partie që uroi punë të mbarë zotit Mustafa dhe tha se ky kuvend bëhet në 100 vjetorin e Pavarësisë së Shqipërisë dhe se ëndrrat e shqiptarëve kurrë nuk duhen të humben dhe tha citatin e një shkrimtari “Kur ëndrrat shkojnë , atëherë jeta është si një zog pa krah”.

Kurse në emër të partisë Lëvizja Socialiste për Integrim e Ilir Metës Kuvendin e përshëndeti prof.dr.Shezai Rrokaj i cili solli me vete mesazhet e Ilir Metës që kurrë në jetën e tij nuk do ta harron pritjen madhështore të tij që ua kanë bërë shqiptarët e Luginës së Preshevës që ishte mesazh mjaft emocionues.

Kuvendi e përshëndetën edhe deputeti i PDSH së Maqedonisë Orhan Ibrahimi,kryetari i komunës së Bujanocit Nagip Arifi etj, ku i u uruan sukses Partisë Demokratike Shqiptare.

Më pas vazhdoi pjesa e punës e Kuvendit ku u paraqit vetëm një emër për kryetar të PDSH-së Ragmi Mustafa. Kësisoj mu për këtë Kuvendi, gjegjësisht Komisioni vendosi që votimi të bëhet me aklamacion dhe ashtu ndodhi, Ragmi Mustafa u zgjodh me aklamacion pa asnjë votë kundër kryetar i PDSH edhe në mandatin e ardhshëm katërvjeçar.

Mustafa, pas kësaj zgjedhje në foltore i falënderoi për besimin e dhënë për kryetar dhe tha se do të angazhohet për t`i realizuar në tërësi objektivat e PDSH-së në përgjithësi. Kuvendi sot zgjedh edhe Këshillin qendror dhe pastaj ky zgjedh kryesinë e partisë./rajonipress/