Rafuna: Prej tetë muajsh nuk është bërë asgjë nga Qeveria për zgjidhjen e krizës ekonomike

Kryetari i Odës Ekonomike të Kosovës, Lulzim Rafuna, ka folur për zhvillimet e fundit në vend sa i takon politikave ekonomike dhe ndihmës së Qeverisë në detyrë për bizneset.

Ai tha se në tetë muaj nuk është bërë asgjë për zgjidhjen e krizës ekonomike, e cila ka prekur bizneset dhe jo vetëm.

Më tej, Rafuna tha se problematik është edhe mosmiratimi i buxhetit të ri,.

“Po hyjmë në një cikël zgjedhjesh të jashtëzakonshme, sepse sipas deklaratave dhe analizave do të jetë e vështirë të kemi qeveri të dielën, që është dita e fundit. Qytetarët janë duke e vuajtur, por edhe biznesi. Një sfidë tjetër është edhe mosmiratimi i buxhetit të ri. Dihet që me ligjin e buxhetit mund të ndahet 1/12-ta, por në muajin mars duhet ta kemi në Kuvend që të shtyhet me një vit implementimi”.

“Nëse ka një vullnet prej partive të opozitës, mund të kapërcehet kjo gjë sepse thirret një mbledhje e jashtëzakonshme. Nëpërmjet një buxheti shihen dhe politikat sociale dhe fiskale dhe ka shumë pikëpyetje. Ne kemi tejkaluar 1 miliard euro marrëveshje që presin në Kuvend”, tha Rafuna për ABC News.al.

Ndërkohë sot Kuvendi i Kosovës ka njoftuar për mbajtjen e seancës për zgjedhjen e qeverisë së re. “Zgjedhja e Qeverisë së Republikës së Kosovës”, thuhet në njoftimin e Kuvendit.