Rafuna: Dogana ka grumbulluar 41 milionë euro më shumë se në tre mujorin e parë të 2015

Drejtori i Doganave të Kosovës, Lulzim Rafuna, në emisionin “Info – Box” të RTV Dukagjini, ka theksuar se në aksionin e fundit të koordinuar në mes Doganave të Kosovës, Prokurorisë Speciale dhe Policisë së Kosovës, janë arrestuar 20 persona të dyshuar për kontrabandë.

Ai ka sqaruar se për këtë aksion kanë qenë të arrestuar 47 persona, duke shtuar se ka gjashtë muaj që janë duke u hetuar të dyshuarit.

“Kemi bastisur rreth 60 lokacione të ndryshme në tërë territorin e Kosovës. Gjithmonë kur ka ngritje te tatimeve ekziston edhe risku që të bëhet kontrabandimi i mallrave. Duhet të jemi të kujdesshëm të mos dalim mbi vendet e rajonit me nivelin e tatimeve, sepse motivi do të jetë më i madh që të ndodhin kontrabandat”, ka thënë Rafuna, transmeton Telegrafi.

Sipas tij, “Dogana e Kosovës gjatë tre mujorit të këtij viti ka grumbulluar 184 milionë euro, derisa po të njëjtën periudhë të një viti më parë kishte grumbulluar 142 milionë euro, që i bie 41 milionë euro se sa periudha paraprake”.

“Gjatë këtyre tre muajve jo vetëm që i kemi arritur, por i kemi kaluar projeksionet tona. Vitin e kaluar e kemi mbyllur me 101 për qind të projeksioneve të arritura ”, ka theksuar ai.

Rafuna ka theksuar se gjatë vitit 2014, 80 oficerë doganorë kanë kaluar nëpër procedura doganore, “ku 14 prej tyre janë suspenduar”, duke shtuar “se në vitin 2015 janë suspenduar 7 ose 8 oficerë dhe në këta tre muaj i kemi 2 oficerë të suspenduar”. /Telegrafi/