Qytetarët, të pasigurt në produkte ushqimore!

Qytetarët e Prishtinës thonë se nuk po vërejnë ndryshim të çmimeve nëpër dyqane në prag të Festës së Bajramit. Por disa prej tyre ankohen për cilësinë e ushqimeve të cilat shiten te ne, që sipas tyre janë shumë të pasigurta.

“Nuk jam duke vërejtur diçka. Të njëjta janë ashtu si kanë qenë përpara”, deklaroi një qytetar nga kryeqyteti. Një tjetër qytetar ankohet se çmimet në përgjithësi në Kosovë janë më të shtrenjta se në vendet e Perëndimit. “Shqiptarët për këto çmime që i paguajnë produktet janë katastrofë, asnjë produkt nuk është me norma, kontroll nuk ka dhe me krahasuar me çmimet e perëndimit, më lirë janë në Itali e Gjermani se në Kosovë”.

Ndryshe nga banorët, menaxheri i marketit “Viva Fresh Store” Rekë Shatri, thotë se kanë bërë përpjekje që t’i ulin çmimet në prag të Festës së Bajramit, duke filluar nga 20 për qind. “Si hipermarket i njohur në Kosovë jemi munduar që në të gjitha artikujt tanë të kemi disa zbritje. Shumica e zbritjeve janë nga 20 për qind e mbi ku janë çmime të arsyeshme për konsumatorë që të jenë sa më të përgatitur për Festën e Bajramit”, ka thënë ai transmeton RTK. (Tribuna)