Qytetarët për vendimin e Kushtetueses, disa të zhgënjyer – disa e mirëpresin

Kundrejt vendimit të Gjykatës Kushtetuese për t’i dhënë të drejtë dekretit të presidentit Hashim Thaçi kanë shprehur mendimin e tyre edhe qytetarët.

Disa prej tyre e cilësojnë si vendim të drejt, e disa të tjerë thonë se janë ndjerë të zhgënjyer nga ky aktgjykim.

Qytetari Fadil Matarova thotë se vendimi i Gjykatës Kushtetuese është i duhur, derisa kërkoi nga liderët politik që të bashkohen dhe të punojnë në të mirë të vendit.

“Mendoj që Kosova është e popullit, kushtetuta, kuvendi janë të popullit, gjykata ka vendosur në emër të popullit dhe e përkrahi dekretin. Që 6 muaj jemi pa qeveri dhe e përkrahi. Edhe Albin Kurti edhe Thaçi duhet të kenë pajtim në mes vete sepse populli ka vuajt shumë për këtë liri e sot duhet të jemi të bashkuar para Serbisë”, tha ai, raporto EO.

Ndryshe thotë qytetari nga Prishtina B.H i cili shprehet i zhgënjyer me vendimin, ai thotë se Kushtetuesja ka marrë këtë vendim në situatë të vështirë kur po përballen me pandeminë, e që nuk ka mundësi të tjera të veprohet.

“Ma i miri u kanë ky Albini, se tash këta e kanë gjetur momentin më të vështirë pandeminë me i grah, e tash le të bëjnë si duan vet, mirë nuk janë tu veprua” tha ai.

Javën e kaluar Gjykata Kushtetuese mori vendim për t’i hapur rrugë formimit të qeverisë së re.

Në aktgjykimin e Gjykatës Kushtetuese thuhet se vendi nuk shkon në zgjedhje, por partie e cila siguron shumicën për të formuar qeverinë udhëheqë me ekzekutivin.