Qytetarët kyçen aktivisht në planifikimin e buxhetit

Gjilan – Xhavit Krasniqi drejtor për buxhet dhe financa në Ranillug tha se me organizimin e takimeve të tilla, do të mundësojmë që qytetarët të kyçen sa më aktivisht në planifikimin e buxhetit, derisa kjo njëherit do të jetë edhe një njohje me të realizuarat dhe projektet e planifikuara.

Komuna e Ranillugut, në bashkëpunim me projektin e Zvicrës -Kosovë për vetëqeverisje lokale dhe decentralizim LOGOS, ka organizuar në Ropotovë të Madhe, një debat publik me temën „Planifikimi i buxhetit me pjesëmarrje të qytetarëve“.

Në debat kanë marrë pjesë zëvendës kryetari i komunës Titomir Stević, zëvendës kryetari për komunitete Lulzim Canaj, përfaqësuesit e projektit nga LOGOS-i, përfaqësuesit e projektit USAID/DEMI, drejtorët e drejtorive, përfaqësuesit e organizatave joqeveritare, bashkësive fetare, si dhe qytetarët e komunës së Ranillugut.

Debatin e ka hapur dhe udhëhequr zëvendës kryetari i komunës Stević, i cili ka falënderuar qytetarët pjesëmarrës në përkrahjen e deritanishme dhe pjesëmarrjen në planifikimin e buxhetit në periudhat paraprake, derisa prezantimin e kornizës afatmesme të buxhetit për periudhën 2014-2016-të e ka bërë drejtori i drejtorisë për buxhet dhe financa dhe inspeksion Xhavit Krasniqi.

Krasniqi përmes prezantimit ka njoftuar qytetarët e pranishëm me sasinë e mjeteve të cilat i ka shpenzuar komuna deri më tani, mjetet nga të hyrat vetanake, mjetet që janë shpenzuar në investime kapitale, si dhe mjetet që komuna planifikon në periudhat e ardhshme t` i shpenzoj në projektet që kanë rëndësi dhe prioritet për të gjithë qytetarët e komunës së Ranillugut.

Gjithashtu të pranishmëve nga ana e menaxherit për tatimin në pronë Miroslav Kostić, u është ofruar informacioni mbi mjetet e mbledhura nga tatimi në pronë për periudhën Janar-Maj 2013-të, si dhe mbi obligimet për vitin 2013-të. Në lidhje me këtë, janë prezantuar kriteret për investime kapitale në bazë të pagesës së tatimit në pronë.

Xhavit Krasniqi tha se me organizimin e takimeve të tilla, do të mundësojmë që qytetarët të kyçen sa më aktivisht në planifikimin e buxhetit, derisa kjo njëherit do të jetë edhe një njohje me të realizuarat dhe projektet e planifikuara. /rajonipress/