QUINT-i: Dhuna në protesta e papranueshme

Përfaqësuesit e shteteve të QUINT-it në Kosovë kanë theksuar të drejtën e qytetarëve për të protestuar, por e kanë dënuar dhunën e përdorur në protestën e së shtunës në Prishtinë.

Ambasadorët e Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës në Prishtinë e theksojnë të drejtën e qytetarëve për të protestuar në mënyrë jo të dhunshme, thuhet në një kumtesë të përbashkët për media, të lëshuar nga Ambasada e Republikës Federale të Gjermanisë në Prishtinë, lidhur me protestat e fundit.

“E drejta për t’u mbledhur në mënyrë paqësore dhe për t’iu bashkuar në mënyrë vullnetare bashkëqytetarëve për të demonstruar është vendimtare për një demokraci funksionale”.

“Megjithatë dhuna në protesta është jo ligjore dhe e papranueshme. Për këtë arsye ne i dënojmë aktet e vandalizmit nga një grup protestuesish më 24 janar ndaj pronës publike dhe private si dhe frikësimin e ekipeve televizive, që poashtu është në kundërshtim me parimet e lirisë së medieve”.

“Ne u bëjmë thirrje qytetarëve të Kosovës për të ushtruar me përgjegjësi të drejtat e tyre demokratike”, përfundon kumtesa e QUINT-it. /Telegrafi/