Qosja: Pushteti i Mustafës si i Milloshevicit, PDK shpesh e humbi rrugën e vet historike

Rexhep Qosja thotë se pajtimi për formimin e Gjykatës Speciale, marrëveshja për krijimin e Bashkësisë së Komunave Serbe dhe ajo për demarkacionin me Malin e Zi, janë tri dhurata të zeza që kryeministri Isa Mustafa ia dhuroi Kosovës.

Në një intervistë për Epokën e Re, Qosja ka thënë se Bashkësia e Komunave Serbe është subjekt juridik që realisht e kufizon mëvetësinë e Kosovës. Duke folur për gjuhën e përdorur nga kryeministri Mustafa me përfaqësuesit e VV’së, Qosja ka thënë se Mustafa me gjuhën politike dhe pushtetore që përdori në qërimin e hesapeve me pjesëtarët e kësaj lëvizje, tregoi se pushteti i tij politik po i përngjan pushtetit politik të Milloshevicit dhe Sheshelt.

Qosja ka folur edhe për partinë e Thaçit, për të cilën ka thënë se në disa raste të veçanta e humbi rrugën e vet historike.

Ai ka thënë se derisa të mund ta mbajë lapsin në dorë do të jetë kundër politikës që me gjuhën, masat apo heshtjen e saj i ka bërë pothuajse të ligjshme shumë të këqija në Kosovë.