Qeveria zvarrit formimin e bordit të AKP-së

Kompletimi i bordit të Agjencisë Kosovare të Privatizimit (AKP) po vazhdon të zvarritet edhe më tej përkundër premtimeve të vazhdueshme të kryeministrit Isa Mustafa. Ky i fundit kishte premtuar se bordi i AKP-së do të jetë funksional qysh në fillim të muajit që lamë pas, por një gjë e tillë nuk ndodhi.

Arban Abrashi, zëdhënës i Qeverisë, ka thënë se pas raportimit të kryeministrit në seancën e ardhshme rreth marrëveshjes më pas do të procedohet në Kuvend emrat e anëtarëve të bordit të AKP-së. Ndërsa, thotë se të gjitha vonesa e deritashme janë bërë si pasojë e zhvillimeve politike që kanë ndodhur kohëve të fundit.

“Kompletimi i bordit të AKP-së është çështje urgjente, por zhvillimet politike të fundit kanë shtyrë përzgjedhjen e tyre. Kryeministri i ka emrat në tavolinë por që ende nuk janë bërë publike në kabinet. Besojmë se pas raportimit të kryeministrit për marrëveshjet e fundit në seancën tjetër do të propozohen emrat për përzgjedhjen e anëtarëve të bordit të AKP-së”, ka thënë ai. Ekspertë të ekonomisë kanë thënë se arsyet e qeverisë janë absurde. Sipas tyre, një arsyetim i këtillë, më shumë flet për mospërgatitje dhe për mungesë përgjegjësie.

Muhamet Mustafa, kryetar i Komisionit për Zhvillim Ekonomik, ka thënë se zgjidhja e bordit të AKP-së është një çështje urgjente që duhet të zgjidhet, pasi që, sipas tij, kanë ngecur shumë procese./zeri/