Qeveria zmbrapset nga amnistia për mosdeklaruesit e pasurisë

Nuk do të kalojë versioni që Qeveria ka sponsorizuar për “amnistinë” e zyrtarëve që nuk e deklarojnë pasurinë.
Ekzekutivi është pajtuar që të modifikohet përmbajtja e atyre ndryshimeve në Kodin Penal që trajtojnë këtë çështje, të cilat muajin e shkuar i ka proceduar për votim në Kuvend, shkruan sot Koha Ditore.

Zmbrapsja e Qeverisë është bërë pas kundërshtimeve të shprehura, si nga Agjencia Kundër Korrupsionit, po ashtu edhe nga shoqëria civile, me përmbajtjen e ndryshimeve në nenin 437 të Kodit Penal, i cili flet për mosraportimin ose raportimin e rremë të pasurisë, të të ardhurave, të dhuratave, të dobisë tjetër materiale ose të detyrimeve financiare.

Ndryshimet kërkojnë që të mos dënohen zyrtarët nëse nuk faktohet motivi i fshehjes së qëllimshme të pasurisë. Dhe, droja e shprehur në publik ishte se këto ndryshime do t’u japin motiv prokurorëve për t’i hedhur të gjitha kallëzimet penale të kësaj natyre.