Qeveria tenton t’ua mbyllë gojën bizneseve

Vendimi skandaloz i Komisionit Rregullativ të Prokurimit Publik. Rritja e çmimit të ankesës ua pamundëson ushtrimin e së drejtës kushtetuese

Vendimi i KRRPP-së për rritjen e çmimit të ankesave të bizneseve ndaj vendimeve të OSHP-së nga 500 euro në 5000 euro nga njohësit e kësaj fushe, deputetë opozitarë dhe nga bizneset është vlerësuar të jetë një tendencë e pushtetit që t’ua mbyllë gojën bizneseve vendore, të cilat nuk do të mund të ankohen ndaj vendimeve të padrejta

Pushtetarët aktualë po akuzohen se me rritjen e çmimit të ankesave po tentojnë t’ua mbyllin gojën bizneseve. Këto akuza kanë ardhur pas një vendimi të njëanshëm të drejtuesve të tashëm të KRPP-së për rritjen e çmimit të ankesave të bizneseve ndaj vendimeve të OSHP-së nga 500 euro në 5000 euro.

Nga njohësit e kësaj fushe, deputetë opozitarë dhe nga bizneset, vendimi i tillë është vlerësuar të jetë një tendencë e pushtetit që tua mbyllin gojën bizneseve vendore. Por, ndaj këtyre akuzave kanë reaguar drejtuesit e rinj të OSHP-së. Kryetari i ri i OSHP-së, Tefik Sylejmani, ka mohuar akuzat se OSHP-ja po tenton që t’ua mbyllë gojën bizneseve për ankesa, pasi ato tash e tutje duhet që të paguajnë 5000 në vend të shumës së 500 euro sa paguanin kohë më parë.”Sipas Ligjit të prokurimit publik, OSHP-ja nuk ka kompetenca që të caktojnë tarifat e ankesave të bizneseve ndaj vendimeve të OSHP-së, por kjo kompetencë i është bart Komisionit Rregullativ për Prokurim Publik të Kosovës”, tha ai.

Harmonizimi i depozitave

Sipas Sylejmanit, këtë të drejtë nuk e kanë as Kuvendi i Kosovës dhe as komisionet e Kuvendit, të cilët nuk vendosin për tarifat, por kjo edhe një herë është kompetencë ekskluzive e KRRPP-së. Ndërsa, kryetari i Komisionit Rregullativ të Prokurimit Publik të Kosovës (KRRPP), Safet Hoxha, në arsyetimin e tij, ka sqaruar se ideja e ndryshimit të tarifave në ankesa pranë OSHP-së ka të bëjë me harmonizimin e depozitave me vlerën e lëndës së ankesës, në mënyrë që të ketë një ngritje lineare të depozitave në ankesa dhe që depozita të jetë në harmoni me vlerën e kontratës së kontestuar. Sipas Hoxhës, një zgjidhje e tillë gjithsesi që do t’i nënshtrohet debatit dhe komenteve të aktorëve në prokurim publik, duke përfshirë botën akademike, mediat, OJQ-të, si dhe operatorët ekonomikë dhe vërejtjet dhe sugjerimet e tilla do të shikohen me fokus të veçantë nga ana e KRRPP-së dhe të njëjtat do të integrohen në rregulloren në fjalë. “Inkurajojmë të gjithë aktorët që me sugjerimet dhe vërejtjet e tyre në këtë draft rregullore të japin kontributin e tyre”, tha ai./kosova sot/