Qeveria s’ka pare për ta nxjerrë Telekomin nga kriza

Z-Mobile nuk pranoi që Telekomi t’ia paguajë borxhin nga 300 mijë euro në muaj, kërkuan që borxhi t’i paguhet me 6 këste, raporton T7

Të martën u bë publik vendimi që nuk do të ketë vazhdim të marrëveshjes me kompaninë Z-Mobile.

Por, pavarësisht kësaj, Telekomi i Kosovës ende nuk i ka kryer obligimet financiare ndaj kompanisë së Blerim Devollit.

Kompania Z-Mobile ka kërkuar që borxhi prej mbi 25 milionë euro të paguhet bazuar në vendimin e Arbitrazhit, në të kundërtën do të fillohen procedurat e përmbarimit, që nënkupton mbylljen e llogarive bankare të Telekomit të Kosovës.

Megjithatë, drejtuesit e Telekomit ishin përpjekur që këtë borxh ndaj Z-Mobile ta paguajnë me këste.

T7 ka siguruar edhe letrën nëpërmjet të cilës kryeshefi i Telekomit, Bedri Istrefi, muajin e kaluar i kishte propozuar Blerim Devollit që borxhin ndaj kompanisë së tij ta paguajnë me këste.

Por, Blerim Devolli këtë ofertë të Telekomit e kishte cilësuar jo serioze.

Siç shihet në dokumentet e siguruara nga T7, Blerim Devolli ka kërkuar që borxhi të paguhet në 6 këste.

Për këtë çështje, T7 ka kontaktuar edhe kryeshefin e Telekomit, Bedri Istrefin.

Ai shpreson në një vendim pozitiv të gjykatës, pasi që është kërkuar prapësim i urdhrit përmbarimor.

Po ashtu, Istrefi ka thënë se nevojitet edhe ndihma e shtetit në këtë situatë.

Por, shpresat për një ndihmë nga aksionari e që është Qeveria e Kosovës, po thuaj se nuk ekzistojnë.

Madje këto shpresa i shuan edhe Ministri i Zhvillimit Ekonomik, Valdrin Lluka.

Si rrezik për rimëkëmbjen e Telekomit, Lluka e sheh edhe dorëheqjen e qeverisë.

Ndërkohë, njohësit e fushës së ekonomisë kërkojnë që Prokuroria të aktivizohet në këtë rast.

Lavdim Hamidi thotë se Devollët do të tentojnë t’i vënë Telekomit një barrë të re financiare.

Z-Mobile kohë më parë kishte fituar rastin në arbitrazh kundër Telekomit të Kosovës.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).