Qeveria refuzon ta subvencionojë KEK’un

Korporata Energjetike e Kosovës nuk ka arritur të bindë Qeverinë për mbështetje financiare.

Qeveria e Kosovës beson që KEK-u mund t’i mbulojë vetë shpenzimet prej 6.3 milionë eurove, të cilat i ka kërkuar për t’i mbuluar shpenzimet fikse për paga. Për më tepër, qeveria nuk e konsideron çështje urgjente kërkesën e KEK-ut për mbështetje financiare pas humbjeve të shkaktuara nga shpërthimi i elektrolizerit në Termocentralin “Kosova A”, shkruan sot Koha Ditore.

“Qeveria e Kosovës konsideron se kërkesa për mbështetje financiare nga ana e KEK-ut nuk është çështje me urgjencë, andaj përgjigje për këtë kërkesë do t’u jepet në kohën e duhur”, thuhet në përgjigjen e Zyrës për Informim të MZHE-së, e cila është udhëheqëse e Komisionit Ndërministror për Ndërmarrjet Publike.

Edhe pse ende nuk kanë marrë ndonjë vendim final, MZHE-ja thotë se KEK-u mundet edhe vetë t’i mbulojë shpenzimet për pagat.

“Konsiderojmë se tani ka ndryshime në sektorin e energjisë elektrike, Qeveria e Kosovës beson se mbase KEK-u do të jetë në gjendje që vetë t’i mbulojë ato shpenzime”, thuhet në përgjigjen e MZHE-së.