Qeveria pranon paaftësinë për ta luftuar korrupsionin

Qeveria ka miratuar një dokument, në të cilin konstatohet shkallë e lartë korrupsioni në vend, e ku korrupsioni politik konsiderohet si tipar kryesor.

Shkaku i kësaj situate, dokumenti përmend ngecjen në njohjen ndërkombëtare të Kosovës.

Konstatimet janë dhënë në Strategjinë kundër korrupsionit 2012-2017, të miratuar ditë më parë në Qeveri. Qeveria e kishte miratuar një vit më parë një draft afërsisht të ngjashëm me këtë të tanishmin, por ai nuk kishte kaluar në Kuvend. Në këtë të riun janë bërë disa ndryshime për objektivat dhe veprimet e parapara të institucioneve për ta luftuar korrupsionin, raporton Koha Ditore.

Në strategjinë që i është proceduar edhe Kuvendit për aprovim, thuhet të jenë vënë re disa përparime në fushën e luftës kundër korrupsionit në periudhën 2009-2011, të cilat kryesisht kanë pasur si interes miratimin e legjislacionit të nevojshëm kundër korrupsionit.

Megjithëkëtë, aty theksohet se perceptimi i përgjithshëm qytetar është se edhe pse kuadri ligjor është shpesh në vend, nuk respektohet ose shpesh nuk përdoret për të sanksionuar shkeljen e ligjit.