Qeveria Kurti ia ka thyer këmbët vetes, shtetndërtimi nuk ka përfunduar ende
Deputeti i AAK-së, Shemsedin Dreshaj, ka kritikuar qeverisjen e Albin Kurtit dhe në veçanti Ministrinë e Punëve të Jashtme, të drejtuar nga Donika Gërvalla.
Duke komentuar tërheqjen e njohjes nga shteti i Togos, Dreshaj u shpreh i pakënaqur me përfaqësimin e vendit në arenën ndërkombëtare.Dreshaj ka thënë në Kanal 10 se Qeveria Kurti “ia ka thyer këmbët vetes”.
Ai tha, se asnjë qeveri nuk ka të drejtë të luajë me fatin e Kosovës, duke theksuar se shtetndërtimi i Kosovës, ende s’ka përfunduar.“Kjo qeveri duhet të koordinohet mirë me miqtë tanë ndërkombëtarë. Shtetndërtimi i Kosovës ende nuk ka përfunduar. Nuk guxojmë ne rrugës, t’ia thejmë këmbët vetes. Unë s’jam i kënaqur me ecurinë deri më tani. Për çështjet që janë për konsum të brendshëm, i konsideroj si luftë me kundërshtarët politikë. Por, për çështjet që janë për vendin, për shtetin e Kosovës, me ato unë nuk bëj politikë”.
“Për këtë vend është derdhur shumë gjak. Është e pandershme të luhet me gjakun e të rënëve. Askush nuk e ka të drejtë me luajtë me fatin e Kosovës. Kërkush s’e ka atë mandat. Unë po frikësohem që s’jemi në rrugë të mirë”, tha më tej Dreshaj.