Qeveria ka mbajtur Ankandin e Bonove të Thesarit prej 15 milionë euro

Qeveria e Republikës së Kosovës ka mbajtur të enjten Ankandin e Bonove të Thesarit KV004-16, ku u ofertuan Obligacione Qeveritare 5-vjeçare në vlerë nominale prej 15 milionë euro. E tërë shuma do të shërbejë si e hyrë buxhetore.

Në këtë ankand tregu shfaqi kërkesë për blerje në vlerë 34.28 milionë euro kurse ne pranuam vetëm shumën e shpallur paraprakisht e që është 15 milionë euro. Norma e interesit për këtë ankand ishte 3.51% vjetore, gjë që paraqet një dallim prej -143 pikësh bazë krahasuar me normën e interesit të ankandit të kaluar të Obligacioneve 5-vjeçare, e cila ishte 4.94%.

Të hyrat nga ky ankand janë 14,998,196.15 euro. Sipas rregullores, kuponi caktohet në 3.5%, që i bie se do të kemi dhjetë pagesa semestrale me nga 262,500 euro. /Telegrafi/