Qeveria e re, me afatizime të hershme për vizat

Ministri i Integrimit Evropian, Blerim Reka, deklaroi se prioritet i kësaj qeverie është liberalizimi i vizave brenda këtij viti. Mirëpo opozita ka lutur ministrin Reka të mos lëshohet në afatizime, por t’i përvishet punës me vendet problematike. Ndërkohë njohësit e integrimeve evropiane thonë se deri më tani Kosova s’është pjesë e agjendës së Këshillit të BE-së për liberalizim, shkruan sot gazeta “Zëri”.

Janë bërë 10 vjet prejse institucionet e Kosovës premtojnë liberalizimin e vizave. Megjithatë, ky zotim nuk është realizuar deri më tani. As qeveria e re “Kurti” nuk ka mundur t’i rezistojë këtij avazi. Madje ministri i Integrimit Evropian, Blerim Reka, para pak ditësh ka deklaruar se prioritet i kësaj Qeverie është liberalizimi i vizave brenda këtij viti. Mirëpo, duke u nisur nga përvojat e së kaluarës, opozita e ka këshilluar Rekën të mos lëshohet në afatizime, por ta nisë punën me shtetet problematike në këtë proces.

Ndërkaq njohës të integrimeve evropiane kanë sqaruar për “Zërin” se deri tani nuk ka indikacione se liberalizimi i vizave do të jetë pjesë e agjendës së Këshillit të BE-së për vitin 2020, ndonëse brenda këtij viti do të mbahen gjithsej katër takime. Mirëpo ata thonë se Kosovës mund t’i ndihmojë marrja e Presidencës së BE-së, për këtë vit nga dy shtete mike, siç janë Kroacia e Gjermania, të cilat do të mundë të përkrahnin liberalizimin e vizave. Por, thonë ata, Kosova nuk mund t’i ikë plotësimit të detyrave të dhëna nga BE-ja.