Kosova nuk ka mundësi ende të vendosë për formimin e ushtrisë së saj, edhe pse kanë kaluar 5 vjet që nga krijimi i shtetit të pavarur. Përfundimisht pritej që në muajin qershor të shfaqej forma e vërtetë e Ushtrisë së Kosovës, por kjo nuk ndodhi.
Qeveria e Kosovës, institucion përgjegjës për të dizajnuar misionin e ardhshëm të FSK-së, tashmë ka hequr dorë nga emri ushtri për forcën e ardhshme mbrojtëse të Kosovës.
Ndërkaq, para 21 janarit do të duhej të vendoste për këtë çështje, pasi FSK-ja mbushë 5 vjet dhe përfundojnë përkufizimet ndërkombëtare ndaj saj, raporton KTV-ja.
Opozita fajëson Qeverinë se është humbur aq shumë kohë në bisedimet me Serbinë, saqë janë mënjanuar obligimet e tjera.
Duke qenë dhe ish-komandantë të luftës, anëtarët e Komisionit për mbikëqyrjen e FSK-së, Rexhep Selimi, Ahmet Isufi dhe Anton Çuni ndihen keq për faktin se më nuk po flitet për Ushtrinë e Kosovës. Ata kanë thënë se po shkelen idealet për çfarë edhe kanë luftuar, ndonëse janë të vetëdijshëm se vulën kryesore për të ardhmen e FSK-së do ta japë NATO.
