Qëndrimet e Ramush Tahirit nuk janë të Presidentes

Zyra e Presidentes ka reaguar ndaj deklaratave të Ramush Tahirit, i cili ka thënë se në zgjedhjet lokale nuk do të ketë lëvizje të mëdha në skenën politike.

Në një përgjigje për Gazetën Express, Zyra e Presidentes Jahjaga ka sqaruar se qëndrimet e Këshilltarit të Presidentes janë personale dhe nuk e përfaqësojnë institucionin ku punon Ramush Tahiri.

“Zyra e Presidentes thekson se qëndrimet e shprehura nga z. Ramush Tahiri janë qëndrime të tij personale dhe pikëpamjet e tij nuk përfaqësojnë qëndrimin e Presidentes së Kosovës”, thuhet në reagimin e Presidentes.

“Sqarojmë opinionin publik se Zyra e Presidentes së Republikës së Kosovës shpreh qëndrimin e saj se zgjedhjet komunale dhe ato për Kryetarë komunash duhet të mbahen në mënyrë demokratike dhe të ndershme si dhe qytetarët të shprehin vullnetin e tyre lirshëm për të zgjedhur përfaqësuesit e tyre”.

Presidentja ka bërë thirrje për zgjedhje të lira, duke thënë se ato duhet të jenë shembull për demokracinë në Kosovë.

“Gjithashtu theksojmë se Zyra e Presidentes mbështet procesin e drejtë zgjedhor dhe iu bën thirrje të gjitha partive politike, subjekteve politike, nismave qytetare, dhe të gjithë kandidatëve të tjerë që garojnë në këto zgjedhje të bëjnë ç’është e mundur për të pasur një proces të qetë dhe të mirë zgjedhor. Këto zgjedhje janë një test demokratik për Kosovën dhe ato duhet të jenë një shembull i pjekurisë tonë demokratike”, thuhet më tej në përgjigjen e Presidencës dërguar Gazetës Express.