Qendra e qytetit bëhet me ndriçim të ri publik

Gjilan – Qendra e qytetit ka filluar të rregullohet me ndriçim të ri meqë ai i vjetri i ka takuar viteve të 70-ta dhe ka shpenzuar shumë rrymë. Për këtë projekt madhor dhe të rëndësishëm për qytetin e Gjilanit tashmë janë ndarë 150 mijë euro tha Fadil Osmani.

E tërë qendra e qytetit tashmë ka filluar të ndriçohet dhe të vendoset kablli i ri elektrik. Qendra e qytetit ka një kohë që nuk ka ndriçim publik dhe ky fakt ka ngjallur shumë reagime edhe në taborin opozitar.

Por pasi janë bërë të gjitha vlerësimet e ekspertëve është konstatuar se qendrës së qytetit i duhet një ndriçim i ri dhe modern. Fadil Osmani menaxher në zyrën e projekteve tha për rajonipress se ndriçimi i ri i cili është një projekt madhor dhe i rëndësishëm për Gjilanin kushton rreth 150 mijë euro dhe punët janë duke shkuar mirë.

Sipas Osmanit ndriçimi publik do të përfshijë rrugët “Bulevardi i Pavarësisë”, dhe “ Abdullah Tahiri” dhe realisht pjesa më e madhe e punëve nëse premton koha duhet të kryhen para 28 nëntorit. Osmani tha se edhe rrjeti edhe shtyllat janë me kualitet, ku do të ketë vend edhe për reklama e rekuizita të përcjellura me drita efiqiente.

Osmani tha se ndriçimi publik i mëhershëm ka qenë i vjetruar dhe i ka takuar viteve të 70-ta dhe realisht ka shpenzuar shumë rrymë. Osmani tha se në këtë projekt ka participuar me 61 mijë euro edhe USAID- amerikan (DEMI).

Kurse Azem Mujku nga drejtoria për shërbime publike tha se qendra e qytetit shumë shpejt do të jetë një vend vërtet tërheqës me një pamje ndriçuese tërë natën. “Ky investim tregon përkushtimin e komunës që të investojë aty ku jeta e banorëve të saj ndryshon për të mirë. “Ndriçimi i ri ka qenë nevojë e kahershme , por edhe prioritet i institucioneve komunale” tha Mujku./rajonipress/