Qasje më demokratike në sistemin e drejtësisë në Kamenicë

Kamenicë – Organizata Jo-Qeveritare Network Of Peace Movement –“NOPM “, ka filluar implementimin e projektit “Monitorimi i rasteve të kontesteve pronësore, zbatimi i gjuhës në seanca dhe përmirësimi i pjesëmarrjes së komuniteteve jo-shumicë në sistemin e drejtësisë”, projekt ky i financuar nga Qendra e Trajnimeve dhe Burimeve për Avokim (ATRC), me fonde nga Agjencia e Shteteve të Bashkuara për Zhvillim Ndërkombëtar (USAID).

Qëllimi i këtij projekti është që t’iu mundësoj qytetarëve, veçanërisht atyre jo-shumicë, shoqërisë civile, dhe grupeve të tjera të interesit, të ndërtojnë një qasje demokratike sa i përket të drejtave të tyre në lidhje me sistemin e drejtësisë.

Gjithashtu qëllim tjetër është sigurimi i përputhshmërisë së gjuhës dhe zbatimin e të drejtave pronësore, gjithashtu qasjen e qytetarëve në sistemin e drejtësisë dhe ngritjen e njohurisë për komunitetet jo-shumicë në lidhje me të drejtat e tyre pranë Degës së Gjykatës Themelore në Kamenicë.

Monitoruesit e OJQ-së, kanë filluar të monitorojnë një numër të seancave, lëndët të cilat janë në proporcion me rastet më të zakonshme që kanë të bëjnë me rastet e pronës në Gjykatën Themelore të Kamenicës.

Në kuadër të projektit do të organizohen katër tryeza të rrumbullakëta mbi të drejtat dhe detyrimet e institucioneve publike dhe gjykatave në drejtim të njëri – tjetrit si dhe me diskutime mbi përputhshmërinë e gjuhës, informatave dhe çështjeve të pronës dhe të drejtave të banimit.

Përpos tryezave OJQ-“NOPM”, do të organizojë një vizitë gjykatës “Dita e Hapur” për nxënësit e shkollave të mesme, të rinj, anëtarë të shoqërisë civile dhe qytetarët e komuniteteve jo-shumicë./rajonipress/