Pushteti i LVV, Gjilanin e mori në qafë, Qeveria stopoi dhe nuk ndau asnjë cent për hapësirat e gjelbërta dhe vazhdimin e sheshit

Gjilan – Qeveria e Kosovës që udhëhiqet nga LVV me ardhjen në pushtet e ka goditur keq qytetin e Gjilanit. Njëri nga projektet më të pritura për vazhdim të punimeve është ndërprerë sepse hapësirat gjelbëruese dhe ndriçimi nuk janë vazhduar dhe si rezultat kanë mbetur pa u finalizuar ndriçimi dhe ulëset nga furra “Aroma” deri tek qendra e modës “Menakon” gati gjysmë kilometri. Qytetarët akuzojnë qeverisjen qendrore për këtë krim të pashembullt.

Është quajtur si projekt personal i Hashim Thaçit rregullimi i lumit “Mirusha”. Ashtu edhe ka ndodhur sepse pjesa më e madhe e punimeve janë kryer në kohën e tij dhe të Qemajl Mustafës.

Ka vazhduar pastaj me Lutfi Hazirin dhe sheshi kishte marrë formën moderne, ndërsa me ardhjen në pushtet të LVV hapësirat gjelbëruese te Projekti krijimi i hapësirave të gjelbërta në Gjilan, i ka ndërprerë punimet për arsye se për të njëjtin projekt nuk janë ndarë fondet nga niveli qendror i Qeverisë së Kosovës dhe projekti i shumë pritur nga qytetarët e Gjilanit ka mbetur në gjysmë, njëra pjesë është finalizuar deri tek furra “Aroma” kurse kanë mbetur pa u finalizuar vetëm ndriçimi dhe ulëset, kurse pjesa e dytë ka mbetur pa u finalizuar ku vazhdon nga furra “Aroma” e deri tek qendra e modës “Menakon” me një gjatësi rreth një kilometri.

Qytetarët dhe ata që e frekuentojnë këtë pjesë kanë vërejtje të mëdha pse nuk është vazhduar ky projekt.

Mazllumi qytetar gjilanas thotë se ai vend e mori formën e një shëtitjeje kreative, por nuk vazhduan punimet tutje.

”Këta të LVV e kanë gabim nëse mendojnë me dënue qytetarin në forma të tilla. Është turp nëse vërtet Qeveria qëllimisht i ndërpret punimet. Unë vet jam në VV, por këtë rrugë të tyre nuk e përkrahi sepse ka mbetur keq pjesa tjetër që ende nuk po përfundon” shton Mazllumi.

Sevdaili një qytetar tjetër thotë se projekti i lumit “Mirusha”, është projekti më madhor i nisur ndonjëherë.

”Unë e di që Hashim Thaçi e ka nisur këtë projekt dhe ka deklaruar hapur se ai është projekt i tij personal. E kam dëgjuar me veshtë e mi dhe tani këta të LVV kinse për inati po i stopojmë punët. Ky është krim sepse prokuroria duhet të hetojë edhe ata që abuzojnë me mungesën e njohurive dhe stopimin e projekteve të mëdha për Gjilanin” tha Sevdaili.

Burhani mendon se po të ishte i ndriçuar sheshi deri në fund dhe po të kishte edhe ulëse sigurisht do të largoheshin edhe qentë endacak dhe narkomanët që jemi në hall prej tyre.

”Unë e kam shtëpinë afër stadiumit dhe ne e shohim gazepin me lloj – lloj individi që sillen aty afër duke marrë drogë e duke shitur atë. Vërtet aty ka skena të rënda dhe komuna duhet t`i ketë parasysh këto situata” shprehet Burhani.

Zyrtarët e Gjilanit asnjëri prej tyre nuk kanë dashur të komentojnë me arsyetimin se është projekt që ka lidhje me qendrën dhe jo me pushtetin komunal, meqë kjo e fundit nuk ka buxhet për një projekt të tillë./rajonipress/