Punëtorët nuk shkojnë pas Haxhi Arifit

Ishte paralajmëruar një muaj më parë. Madje thuhej se do të jetë një protestë madhështore. Por, në fakt ndodhi krejt ndryshe. Të mërkurën ftesës së Haxhi Arifit iu përgjigjën veç 200 veta. E, shumica e tyre ishin pleq dhe plaka, tanimë në pension. Bashkimin e Sindikatave të Pavarura të Kosovës e injoruan shumica e punëtorëve dhe sindikalistëve që i paguajnë anëtarësi, duke thënë se Arifin nuk e njohin si kryetar.

Edhe ata që i ishin bashkuar protestës nuk thanë fjalë të mira për të parin e BSPK-së. Madje i fishkëllyen derisa ai mbante fjalimin para masës. Arsyeja që sindikalistët u mblodhën para Teatrit Kombëtar në Prishtinë ishte mosrealizimi i kërkesave të tyre përmes dialogut me Qeverinë siç ishte pritur. E, kërkesat e protestës që ishte thirrur me moton “Pesë minuta para dymbëdhjetëve”, ishin të shumta.

Si zbatimin e ligjeve për të drejtat e punëtorëve në praktikë, nënshkrimin e marrëveshjes kolektive, zbatimin e marrëveshjes për pagën minimale prej 220 euro, miratimin e ligjit për pensionistët, e pranimin e stazhit të punës për vitet 1990-1999.(Tribuna)