Punëtorët e kombinatit “Trepça” që nga mbrëmë janë duke vazhduar grevën, me arsyetimin se ata nuk kanë marrë ende pagën e muajit tetor.
Sipas kryetarit të Sindikatës së Punëtorëve të “Trepçës”, Gani Osmani, punëtorët do ta vazhdojnë grevën derisa ta marrin pagën e mbetur.
Osmani për “Telegrafin” tha se punëtorët e tri ndërrimeve kanë hyrë në grevë.
“Që nga dita e djeshme, përkatësisht nga mbrëmë, punëtorët e ‘Trepçës’ janë duke mbajtur grevë, me arsyetimin se ende nuk e kanë marrë pagën e mbetur të muajit tetor. Punëtorët janë këmbëngulës që do ta vazhdojnë të mos punojnë derisa ta marrin pagën”, tha Osmani.
Ndryshe, Qeveria e Kosovës në fillim të javës kishte marrë vendim që “Trepçës” t’i ndahen 1.1 milion euro.
Ky vendim është marrë pasi minatorët e minierës në Stantërg kishin ndërprerë punën në fillim të këtij muaji për shkak të mosmarrjes së pagave për muajin tetor.
Gjithashtu, disa herë punëtorët e kombinatit “Trepça” kanë pasur vonesa në marrjen e pagave.
