Punësimi, mision i pamundur

​Dy partitë më të mëdha, Partia Demokratike dhe Lidhja Demokratike, që kanë lidhur koalicion për ta udhëhequr qeverinë e ardhshme duhet ta kenë një shkop magjik për ta realizuar premtimin për vende pune.

Në bazë të parametrave ekonomikë, punësimi i 200 mijë njerëzve për dy mandate konsiderohet mision i pamundshëm nga njohësit e ekonomisë, por edhe nga vet përfaqësuesit e këtyre dy partive politike.

Profesori i ekonomisë Muhamet Sadiku, vlerëson se premtimet që i kanë këto dy parti janë jashtë logjikës ekonomike, sepse sipas tij, Kosova ka rritjen ekonomike më të vogël në rajon.

“Premtime që thotë populli nuk i kap lapsi, janë hy me premtime marramendëse dhe sidomos me uljen e papunësisë janë jashtë logjikës ekonomike. Papunësia është problem afatgjatë.

Kosova e ka nivelin më të ulët të zhvillimit ekonomik në Evropë. Bruto produktin për kokë banori 2500 euro, ndërsa vendet e BE-së mesatarja rreth 28 mijë euro dhe rritja ekonomike 3 për qind nuk ka gjasë që do të krijojë ndryshime. Vetëm rritja mbi 8 për qind mund të ketë ndryshime e duhura sociale në shoqëri”, i tha Sadiku gazetës Tribuna.

Ndërsa, deputeti i LDK’së Ali Sadrija ka thënë se është skeptik se Qeveria e ardhshme mund bëjë diçka në punësimin e njerëzve nëse nuk ndërmarr masa rigoroze të ndryshimit.

Ai madje thotë se ekonomia kurrë nuk ka qene në gjendje më të keqe, për shkak se janë duke udhëhequr njerëz jo profesionalistë që nuk njohin gjerat.