“Pse duhet ta pyesim historinë për ta ndërtuar ardhmërinë“?

Nga Arben Kurteshi – Rrethanat dhe kushtet për arritjen e lirisë dikur i krijuam vetë me angazhim, vullnet dhe guxim, duke punuar drejt qëllimit; ato nuk u krijuan vetvetiu!

Historia jonë është një udhërrëfyes që na tregon se si krijohen rrethana për sukses.

Ajo ilustron lidhjen e idealit të zemrës dhe vizionit të mendjes me cakun që synojmë.

Gjendja aktuale dhe kushtet në të cilat ndodhet shteti ynë i ri janë një reflektim i përpjekjeve tona.

Pra, të përqendrohemi në krijimin e një mjedisi të favorshëm për investitorët, duke i kontaktuar ata proaktiv institucionet tona, dhe duke u përpjekur të plotësojmë të gjitha kërkesat, kushtet dhe nevojat e tyre, qofshin ato ligjore, infrastrukturore apo sociale.

Qëllimi ynë është të krijojmë të gjitha kushtet e nevojshme, duke punuar me vendosmëri dhe guxim, për të fituar besimin e thellë të investitorëve.

Të kemi synimin që kapitali të rrjedhë më lehtë e më shpejt drejt vendit tonë, dhe të shndërrohet në një ekonomi të vrullshme, të zhvilluar, të hapur dhe të fuqishme, ku çdo qytetar mund të gjejë punë për një jetë të dinjitetshme dhe askush nuk do të detyrohej ta braktisë vendin për të kërkuar punë në vende të tjera./rajonipress/