Provoni të bëni ndryshime

Nga Betim Osmani – “Një person mund të bëjë një ndryshim, dhe të gjithë duhet të provoni.” John F. Kennedy, president i tridhjetepestë i Shteteve të Bashkuara të Amerikës.

Pavarësisht nga përmirësimet e kohëve të fundit në infrastrukturën rrugore, në Gjilan, mungesa e parkingjeve, trotuaret për lëvizjen e lirshme të këmbësorëve me simetri adekuate, mungesa e semaforëve, shtrirja e ndriçimit publik nëpër gjitha lagjet e qytetit ende mbeten sfidë për autoritetet lokale.

Me përjashtim të qendrës së qytetit, përkatësisht, në të dy anët përgjatë sheshit Agim Ramadani, rruga “Bulevardi i Pavarësisë” dhe disa rrugë tjera me infrastrukturë të rregulluar, në disa pjesë tjera të qytetit trotuaret nuk janë në nivelin e duhur. Disa nga trotuaret ekzistues nuk kanë gjerësi të përshtatshme për të shërbyer rrjedhjen e lirshme të këmbësorëve.

Përgjatë rrugëve “Adem Jashari”, “Medllin Ollbrajt”, dhe “Pajazit Ahmeti”, trotuaret pothuajse gjithnjë janë me pengesa të ndryshme për këmbësorët; të bllokuara nga automjetet e parkuara në mënyrë të paligjshme, nga shitësit ambulantë, nga mallra të ekspozuar, etj. Paramendoni, në vendet ku trotuaret janë të destinuara për lëvizjen e këmbësorëve, automjetet parkohen dhe qytetarët duhet të ecin në mes të rrugëve.

Ky është një kërcënim i drejtpërdrejtë për ngasësit e automjeteve dhe këmbësorët. Të gjithë e shohim këtë dukuri negative çdo ditë dhe askush nuk ndërmerr asgjë. Ky është shqetësim qytetar – duhet të ishte edhe shqetësim për Policinë e Kosovës. Policia duhet të ndërmarrin veprime të parapara me ligj… të shqiptojnë masa ndëshkimore ndaj të gjithë atyre që nuk zbatojnë rregullat e komunikacionit.

Çfarë e bën edhe më delikate situatën është fakti se në disa pjesë të Gjilanit trotuaret nuk ekzistojnë fare. Shembull konkret, rruga Vëllezërit Xhakli e cila edhe lidh fshatin Livoç të Epërm me qytetin. Në asnjërën anë të rrugës nuk ka trotuare e ndriçim të cilat përbëjnë rrezik të vazhdueshëm për këmbësorët. Gjatë vitit 2012, respektivisht më 31 Korrik, bëra një kërkesë drejtuar Kuvendit Komunal – Drejtorisë së Shërbimeve Publike për rregullimin e trotuarit dhe ndriçimit publik.

Prej kur kërkesa u pranua dhe protokollua nga zyrtarët komunal, për çudi, deri më sot nuk kam pranuar ndonjë përgjigje. Fakti qëndron se akoma është e nevojshme dhe e domosdoshme për një investim i cili do të evitonte aksidentet e mundshme të këmbësorëve dhe përmirësoj kushtet e jetës.

(Autori është gjilanas)