Fundamenti

Promovohet Monografia “Gjilani me rrethinë”

/ 3 minuta lexim

Gjilan – Pas një pune të madhe e të palodhshme qyteti i Gjilanit dhe qytetarët e saj kanë rastin që ta njohin më mirë dhe më shpejt Gjilanin me rrethinë. Dhe këtë punë kolosale e ka sjellur këshilli botues e redaktues pikërisht në vigjilje të 100 vjetorit të shtetit shqiptarë.

Gjilani tash e tutje mund të krenohet se ka rrënjë, se ka histori, se ka pasqyrë gjeografike, ekonomike, politike e kulturore, se Gjilani tani e tutje ka identitet e emër. Të hënën vonë pasdite është promovuar Monografia “Gjilani me rrethinë”. Për rolin e Monografisë folën Qemajl Mustafa, Mehmet Halimi, Aliriza Selmani, Tefik Basha, Sabri Tahiri e Drita Statovci.

Qemajl Mustafa i cili edhe ishte ideator e kreator i kësaj pune kolosale për Gjilanin tha se Monografia është një libër gjithëpërfshirës që në vete përmban vizionin dhe projektet tona për të ardhmen. “Tash e tutje Gjilanin shumë më lehtë mund ta njohin dhe ta duan të tjerët sepse kemi çka tu ofrojmë delegacioneve të huaja e miqve tanë ndërkombëtarë. Monografia ka rëndësi historike dhe është një pasuri e rrallë, por falë punës ekipore tani jemi në finalen e saj të madhe” tha Mustafa.

Mehmet Halimi kryeredaktor i librit pati emocione gjatë fjalimit të tij. Ai së pari e ka puthur Monografinë dhe shtoj se ekipi që ai udhëhoqi kishte dëshirë, vullnet e gatishmëri. Sipas tij Monografia e bënë Gjilanin më të afirmuar, më të avancuar sepse ajo ka informacione të bollshme dhe gjithëpërfshirëse . “Gjilani pa monografi është sikur të jetë pa emër e tani ky qytet e ka letërnjoftimin e vet historik” tha ai.

Uji Dea

Halimi tha se monografia është shkruar me kompetencë dhe saktësi kurse hartues i projektit të saj ishte Sabri Tahiri, derisa e tërë puna është kryer përmes 6 redaksive dhe shumë autorëve, bashkëpunëtorëve dhe ekspertëve të lëmive të ndryshme.

Edhe Aliriza Selmani historian dhe Tefik Basha gjeograf thanë se monografia është vepër e çmuar derisa Sabri Tahiri ideator i projektit të Monografisë tha se kjo vepër qytetin e Gjilanit e bënë më të afirmuar dhe më reprezentativ në fushën ndërkombëtare.

Librin e parë për Monografinë Mehmet Halimi në mënyrë simbolike ia dorëzoj kryetarit të Komunës Qemajl Mustafa. /rajonipress/