Prokuroria është ankuar për paraburgimin katërditor të Hamitit

Prokurori publik i EULEX-it, Pascal Persoons, i ka adresuar ankesë gjyqtarit të procedurës paraprake Vehbi Kashtanjeva, lidhur me aktvendimin që ai kishte lëshuar të martën për paraburgim katërditor kryesuesit të Kuvendit Komunal të Prishtinës, Sami Hamiti, si dhe dy afaristëve të tjerë Agim Ademi dhe Muharrem Rama, shkruan sot Koha Ditore.

Përmes ankesës, ai kishte vlerësuar se masa e paraburgimit katërditor ishte gabim shtypi dhe se ajo do të duhej të figuronte ashtu si në aktvendimin e parë. Masa e paraburgimit në këtë aktvendim ishte vlerësuar nga mbrojtja si “paraburgim i dyfishtë”. Po ashtu gjyqtari Kashtanjeva përmes aktvendimit të së martës nuk kishte përfillur as konstatimet e Gjykatës Supreme të dhëna para më shumë se një jave se paraburgimi i këtyre të treve ishte i jashtëligjshëm.

Në ankesën e prokurorit Persoons thuhet se gjyqtari Kashtanjeva, në vendimin e tij pas rishqyrtimit të çështjes, nxori një urdhër për paraburgim nga një datë e mëvonshme, dhe se në urdhrin e tij të parë ai e kishte pasur të shkruar që paraburgimi do të zgjaste një muaj.