Prokuroria e Gjilanit ngre katër aktakuza ndaj pesë personave për vjedhje shërbimesh, vjedhje dhe ngasje në gjendje të dehur

Gjilan – Prokuroria Themelore në Gjilan ka bërë të ditur se gjatë 24 orëve të fundit ka ngritur katër aktakuza ndaj pesë personave, të dyshuar për kryerjen e veprave të ndryshme penale.

Sipas njoftimit të Prokurorisë, dy aktakuza janë ngritur ndaj dy personave për veprën penale “Vjedhja e shërbimeve”, ndërsa një aktakuzë është ngritur ndaj dy personave për veprën penale “Vjedhja”.

Po ashtu, Prokuroria ka ngritur edhe një aktakuzë ndaj një personi për veprën penale “Ngasja në gjendje të paaftë apo të dehur”, vepër e cila konsiderohet ndër shkeljet që rrezikojnë sigurinë në komunikacion.

Nga Prokuroria Themelore në Gjilan theksohet se trajtimi i rasteve penale dhe ndjekja e autorëve të dyshuar mbetet prioritet, me qëllim të zbatimit të ligjit, mbrojtjes së rendit juridik dhe garantimit të sigurisë së qytetarëve./rajonipress/