Prokuroria e Gjilanit ndalon pesë persona dhe ngre dy aktakuza për vjedhje të rëndë dhe vjedhje të shërbimeve

Gjilan – Prokuroria Themelore në Gjilan ka bërë të ditur se gjatë 24 orëve të fundit, me urdhër të prokurorit të shtetit, janë ndaluar pesë persona për vepra të ndryshme penale, ndërsa janë ngritur edhe dy aktakuza ndaj katër personave të dyshuar.

Sipas njoftimit zyrtar, në dy raste të ndara, më 11 qershor 2026, prokurori i shtetit ka urdhëruar ndalimin e pesë personave për një periudhë prej 48 orësh.

Në rastin e parë, tre persona janë ndaluar nën dyshimin për kryerjen e veprave penale “Lëndim i lehtë trupor” dhe “Asgjësimi apo dëmtimi i pasurisë”, vepra të sanksionuara me nenet 185 dhe 321 të Kodit Penal të Republikës së Kosovës.

Ndërkaq, në rastin e dytë, dy persona të nacionalitetit serb janë ndaluar si të dyshuar për veprat penale “Vetëgjyqësia”, “Mbajtja në pronësi, kontroll ose posedim të paautorizuar të armëve” dhe “Asgjësimi apo fshehja e materialit arkivor”, të parapara me nenet 410, 366 dhe 408 të Kodit Penal të Kosovës. Të dyshuarit ishin duke u hetuar në kuadër të procedurave të zhvilluara nga organet e drejtësisë.

Përveç ndalimeve, Prokuroria Themelore në Gjilan ka ngritur edhe dy aktakuza ndaj katër personave për vepra të ndryshme kundër pasurisë.

Një aktakuzë është ngritur kundër tre personave për veprën penale “Vjedhje e rëndë”, ndërsa aktakuza tjetër është ngritur kundër një personi për veprën penale “Vjedhje e shërbimeve”.

Prokuroria ka theksuar se mbetet e përkushtuar në luftimin e kriminalitetit dhe në ndjekjen e të gjitha rasteve që cenojnë rendin juridik, sigurinë publike dhe pasurinë e qytetarëve.

Hetimet për rastet në fjalë vazhdojnë në koordinim me Policinë e Kosovës dhe institucionet e tjera kompetente, me qëllim zbardhjen e plotë të rrethanave dhe sigurimin e përgjegjësisë ligjore për të gjithë personat e përfshirë./rajonipress/