Projekti i ujësjellësit në Fshatin e Ri drejt përfundimit, Haliti kërkon intensifikimin e punimeve

Viti – Kryetari i Komunës së Vitisë, Sokol Haliti, ka zhvilluar një takim pune me përfaqësuesit e kompanisë zbatuese, ekipin mbikëqyrës të projektit, kryetarin e Fshatit të Ri dhe zyrtarë komunalë, për të shqyrtuar ecurinë e punimeve dhe hapat e fundit për finalizimin e projektit të ujësjellësit.

Gjatë takimit u diskutua për dinamikën e realizimit të punimeve, ndërsa u morën vendime konkrete për intensifikimin e angazhimeve, me qëllim që projekti të përfundojë brenda afateve të planifikuara.

Sipas komunës, nëse punimet vijojnë sipas planit dinamik, projekti do të përmbyllet gjatë muajit shtator, periudhë kur banorët e Fshatit të Ri pritet të kenë në dispozicion rrjetin e ri të furnizimit me ujë të pijshëm.

Kryetari Haliti e cilësoi këtë investim si një ndër projektet më të rëndësishme infrastrukturore për këtë lokalitet, duke theksuar se Komuna e Vitisë do të vazhdojë ta monitorojë nga afër zbatimin e punimeve deri në përfundimin e tyre.

Ai nënvizoi se funksionalizimi i ujësjellësit do të ketë ndikim të drejtpërdrejtë në përmirësimin e cilësisë së jetës së banorëve, duke siguruar furnizim të qëndrueshëm dhe cilësor me ujë të pijshëm për Fshatin e Ri./rajonipress/